វិមានក្រឹមឡាំងបានឲ្យដឹងនៅថ្ងៃអង្គារ (ទី១១ ខែវិច្ឆិកា) នេះថា ខ្លួនមិនបានទទួលការបញ្ជាក់ច្បាស់លាស់ណាមួយពីសហរដ្ឋអាមេរិក ពាក់ព័ន្ធនឹងការកត់សម្គាល់ ជុំវិញការចាប់ផ្ដើមឡើងវិញនូវលទ្ធភាពនៃការសាកល្បងនុយក្លេអ៊ែរនោះឡើយ។

គួរដឹងថា លោកប្រធានាធិបតី Donald Trump កាលពីខែមុន បានបញ្ជាឲ្យយោធាអាមេរិកចាប់ផ្តើមដំណើរការឡើងវិញភ្លាមៗ សម្រាប់ការសាកល្បងអាវុធនុយក្លេអ៊ែរ។

ប៉ុន្តែលោកមិនបានបញ្ជាក់ឲ្យបានច្បាស់លាស់ថា តើលោកចង់សំដៅដល់ការបាញ់បង្ហោះសាកល្បងនូវមីស៊ីលដែលមានសមត្ថភាពពាំក្បាលគ្រាប់នុយក្លេអ៊ែរ ឬក៏ចាប់ផ្ដើមសាកល្បងឡើងវិញ ពាក់ព័ន្ធនឹងការបំផ្ទុះនុយក្លេអ៊ែរ ជាអ្វីដែលទាំងសហរដ្ឋអាមេរិក និងរុស្ស៊ី មិនបានធ្វើអស់រយៈពេលជាង ៣ទសវត្សរ៍មកហើយនោះ។

ហើយទីក្រុងមូស្គូបានលើកឡើងថា ខ្លួនចង់ឲ្យទីក្រុងវ៉ាស៊ីនតោន បំភ្លឺអំពីស្ថានភាពនេះ។ តែនៅពេលត្រូវសួរអំពីបញ្ហានេះ នាថ្ងៃអង្គារនេះ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា ទីក្រុងមូស្គូមិនទាន់ទទួលបានការពន្យល់ណាមួយពីភាគីសហរដ្ឋអាមេរិក អំពីប្រភេទនៃការធ្វើតេស្តសាកល្បងដែលលោក Trump សំដៅទៅលើនោះទេ៕