ខណៈដែលកិច្ចប្រជុំចុងក្រោយនៃរដ្ឋមន្ត្រីការបរទេសរបស់ក្រុមប្រទេសទាំង៧ ឬG7 ចាប់ផ្តើមនៅប្រទេសកាណាដា នាថ្ងៃអង្គារ (ទី១១ ខែវិច្ឆិកា) នេះ រដ្ឋមន្ត្រីការបរទេសកាណាដា លោកស្រី Anita Anand បាននិយាយថា របៀបវារៈនឹងផ្តោតលើវិបត្តិនានា ដែលរួមមានបញ្ហាសន្តិសុខនៅតំបន់អាក់ទិក សង្រ្គាមនៅប្រទេសអ៊ុយក្រែន និងការធានាសន្តិភាពនៅតំបន់មជ្ឈិមបូព៌ា។

អំឡុងយុគសម័យនៃការមាន «ភាពប្រែប្រួលភូមិសាស្ត្រនយោបាយ» លោកស្រី Anand បានលើកឡើងថា សមភាគីអាមេរិករបស់លោកស្រី លោក Marco Rubio បានក្លាយជា «សមាជិកប្រកបដោយការស្ថាបនា» របស់ G7 ហើយបានសរសើរសហរដ្ឋអាមេរិក សម្រាប់កិច្ចប្រឹងប្រែងរបស់ខ្លួន ក្នុងការធានាសន្តិភាព នៅតំបន់មជ្ឈិមបូព៌ា។

លោកស្រី Anand បានបញ្ជាក់ទៀតថា លោកស្រីរំពឹងថា នឹងផ្តោតការសន្ទនាជាមួយដៃគូ អំពី «ផ្លូវដ៏វែងឆ្ងាយឆ្ពោះទៅ» កាន់ការបង្កើតសន្តិភាពទាំងនៅប្រទេសអ៊ុយក្រែន និងតំបន់មជ្ឈិមបូព៌ា។

លោកស្រីបានសង្កត់ធ្ងន់ថា «យើងត្រូវមានមហិច្ឆតា សម្រាប់គោលបំណងនៃការបង្កើតសន្តិភាពយូរអង្វែង» ហើយបានកត់សម្គាល់ថា នៅពេលដែលរដូវរងាមកដល់ ប្រទេសកាណាដា និង G7 នឹងសម្លឹងមើលពីរបៀបដែលល្អបំផុត ដើម្បីគាំទ្រប្រជាជនអ៊ុយក្រែន តាមរយៈហេដ្ឋារចនាសម្ព័ន្ធថាមពល ការផ្គត់ផ្គង់ស្បៀងអាហារ និងការកសាងឡើងវិញរយៈពេលវែង។

លោកបណ្ឌិត John Kirton ស្ថាបនិកក្រុមស្រាវជ្រាវ G7 នៅសកលវិទ្យាល័យ Toronto បាននិយាយថា វាទំនងជារដ្ឋមន្ត្រីការបរទេស នឹងសម្រេចការងារបានច្រើននៅក្នុងកិច្ចប្រជុំ នៅទីក្រុង Niagara-on-the-Lake ជាងកិច្ចប្រជុំមុនរបស់ប្រមុខរដ្ឋ G7 កាលពីខែមិថុនា នៅទីក្រុង Kananaskis៕