លោកប្រធានាធិបតី Donald Trump បានអះអាងពីជ័យជម្នះកាលពីថ្ងៃអង្គារ ១១ វិច្ឆិកា លើគូប្រជែងក្រុមអ្នកប្រជាធិបតេយ្យលើការបិទទ្វាររដ្ឋាភិបាលអាមេរិកដ៏យូរបំផុត ក្នុងសុន្ទរកថាមួយនៅពិធីប្រចាំឆ្នាំមួយដើម្បីគោរពដល់អតីតយុទ្ធជនយោធាអាមេរិក។

លោក Trump បានលើកពីការពិតដែលសមាជិកព្រឹទ្ធសភាប្រជាធិបតេយ្យជាច្រើនរូបបានបំបែកភាពជាប់គាំងកាលពីថ្ងៃចន្ទដើមសប្ដាហ៍នេះ រួមគ្នាបោះឆ្នោតជាមួយក្រុមអ្នកសាធារណរដ្ឋសម្រាប់កិច្ចព្រមព្រៀងមានការសម្របសម្រួលដើម្បីបើកផ្លូវសម្រាប់ការបញ្ចប់ការប្រឈមដាក់គ្នារបស់សភា។

លោក Trump បាននិយាយទៅកាន់ប្រធានសភារបស់គណបក្សសាធារណរដ្ឋលោក Mike Johnson នៅពេលលោកចូលរួមក្នុងពិធីទិវាអតីតយុទ្ធជននៅ ទីបញ្ចុះសពជាតិ Arlington ថា អបអរសាទរចំពោះជ័យជម្នះដ៏ធំនេះ ។ 

លោក Trump បានបន្ថែមថា ពួកលោកកំពុងបើកប្រទេសរបស់ខ្លួនឡើងវិញហើយ   រដ្ឋាភិបាលអាមេរិក មិនគួរត្រូវបានបិទទ្វារទៀតឡើយ។

ការបិទទ្វារនេះបានធ្វើឱ្យបុគ្គលិកសហព័ន្ធមួយលាននាក់មិនទទួលបានប្រាក់ខែ រំខានដល់ការធ្វើដំណើរតាមផ្លូវអាកាសមុនរដូវកាលវិស្សមកាល និងគំរាមកំហែងដល់អត្ថប្រយោជន៍អាហារចំពោះគ្រួសារដែលមានប្រាក់ចំណូលទាប។       

សមាជិកព្រឹទ្ធសភាមកពីគណបក្សប្រជាធិបតេយ្យចំនួនប្រាំបីរូប បានប្រឆាំងនឹងគណបក្សខ្លួនឯង ដើម្បីគាំទ្រសេចក្តីព្រាងច្បាប់ដែលនឹងផ្តល់មូលនិធិដល់រដ្ឋាភិបាលរហូតដល់ខែមករា។ ឥឡូវនេះសេចក្ដីស្នើច្បាប់នេះ នឹងទៅដល់ដៃសភានៅថ្ងៃពុធនេះ ពេលវេលានៅសហរដ្ឋអាមេរិក មានន័យថាការបិទទ្វាររដ្ឋាភិបាលអាចបញ្ចប់នៅថ្ងៃសុក្រសប្ដាហ៍នេះ៕