ក្រុមអ្នកតវ៉ាជនជាតិភាគតិចរាប់សិបនាក់ បានសម្រុកចូលទាំងបង្ខំ ទៅក្នុងទីកន្លែងកិច្ចប្រជុំកំពូលអាកាសធាតុ COP30 ក្នុងប្រទេសប្រេស៊ីល កាលពីថ្ងៃអង្គារ (១១ វិច្ឆិកា) ហើយបានប៉ះទង្គិចយ៉ាងតានតឹងជាមួយឆ្មាំសន្តិសុខនៅច្រកចូល។

ក្រុមបាតុករស្រែកតវ៉ាពោរពេញដោយកំហឹង និងទាមទារចូលទៅកាន់បរិវេណនៃជំនួប ជាទីដែលគណៈប្រតិភូរាប់ពាន់នាក់មកពីប្រទេសជុំវិញពិភពលោក កំពុងចូលរួមកិច្ចប្រជុំកំពូលស្តីពីអាកាសធាតុរបស់អង្គការសហប្រជាជាតិ COP30 នៅឆ្នាំ២០២៥នេះ។

អ្នកខ្លះគ្រវីទង់ជាតិដែលមានសរសេរពាក្យតវ៉ាទាមទារសិទ្ធិដីធ្លី ឬកាន់ស្លាកសរសេរថា «ទឹកដីយើងមិនមែនសម្រាប់លក់ទេ»។ មេដឹកនាំជនជាតិដើមភាគតិចម្នាក់មកពីសហគមន៍ Tupinamba នៅជិតផ្នែកខាងក្រោមនៃទន្លេ Tapajos របស់ប្រេស៊ីល បានប្រាប់សារព័ត៌មានរ៉យទ័រថា ពួកគេខកចិត្តណាស់ ចំពោះការអភិវឌ្ឍដីធ្លីដែលកំពុងបន្ត ក្នុងតំបន់ព្រៃដែលគេរស់នៅ។

ទិដ្ឋភាពយ៉ាងវឹកវរបានកើតឡើងក្នុងការតវ៉ា ដោយមន្រ្តីសន្តិសុខបានរុញច្រានហ្វូងបាតុករឱ្យថយក្រោយ ហើយប្រើតុរារាំងច្រកចូល។ សាក្សីនៅទីនោះរៀបរាប់ថា ពួកគេឃើញសន្តិសុខម្នាក់ដែលហាក់ត្រូវរបួស បានជិះរទេះរុញទាំងប្រញាប់ប្រញាល់ចេញពីកន្លែងតវ៉ា ហើយអ្នកយាមម្នាក់ទៀតដែលមានស្នាមរបួសមុតថ្មីៗចំបរិវេណភ្នែក បាននិយាយថា សន្តិសុខត្រូវវាយចំក្បាលក្នុងភាពចលាចលនោះ។

បន្ទាប់ពីការប៉ះទង្គិច ក្រុមបាតុករក៏បំបែកគ្នាភ្លាមៗ។ អ្នកតវ៉ាទាំងនេះគឺស្ថិតក្នុងក្រុមមនុស្សរាប់រយនាក់ ដែលដើរដង្ហែតាមដងផ្លូវទៅកន្លែងប្រារព្ធព្រឹត្តិការណ៍ COP30 ក្នុងទីក្រុងព្រៃអាម៉ាហ្សូន Belem របស់ប្រេស៊ីល ដោយជំរុញមេដឹកនាំពិភពលោក ឱ្យឈប់ "លេងល្បែង" ភ្នាល់ដាក់អនាគតពួកគេទៀតទៅ ហើយងាកទៅរកដំណោះស្រាយពិតប្រាកដលើបញ្ហាអាកាសធាតុ៕