ជនម្នាក់បានបំផ្ទុះគ្រាប់បែកអត្តឃាត បណ្ដាលឱ្យមនុស្សយ៉ាងតិច ១២នាក់ បានស្លាប់ នៅក្នុងរដ្ឋធានីរបស់ប្រទេសប៉ាគីស្ថាន កាលពីថ្ងៃអង្គារ (១១ វិច្ឆិកា) ដែលបង្ហាញពីកំណើនយ៉ាងតានតឹងនៃអំពើហិង្សាសកម្មប្រយុទ្ធ នៅក្នុងអ្វីដែលរដ្ឋមន្ត្រីការពារជាតិប៉ាគីស្ថាននិយាយថា បានរុញច្រានប្រទេសឱ្យធ្លាក់ទៅក្នុង "ស្ថានភាពនៃសង្រ្គាម"។

បណ្ដារដ្ឋមន្ត្រីនៃរដ្ឋាភិបាលប៉ាគីស្ថាន បានចោទប្រទេសជិតខាងរបស់ខ្លួនគឺអាហ្វហ្គានីស្ថាន ថាមានជាប់ពាក់ព័ន្ធនៅក្នុងការបង្ហូរឈាមនេះ ប៉ុន្តែទីក្រុងកាប៊ុលបានបដិសេធ។ ប៉ាគីស្ថានបានប្តេជ្ញាសងសឹក ប្រសិនបើអាជ្ញាធរអាហ្វហ្គានីស្ថាន បរាជ័យក្នុងការតាមប្រមាញ់ក្រុមសកម្មប្រយុទ្ធ ដែលទទួលខុសត្រូវលើវាយប្រហារទាំងនោះ។

បន្ទាប់ពីការវាយប្រហារ ដែលជាលើកដំបូងក្នុង ១ទសវត្សរ៍ទៅលើជនស៊ីវិលក្នុងទីក្រុងអ៊ីស្លាម៉ាបាដ លោករដ្ឋមន្ត្រីការពារជាតិ Khawaja Muhammad Asif បាននិយាយថា "ប៉ាគីស្ថានស្ថិតក្នុងស្ថានភាពនៃសង្រ្គាម។ ការនាំយកសង្រ្គាមនេះទៅកាន់ទីក្រុងអ៊ីស្លាម៉ាបាដ គឺជាសារមួយពីទីក្រុងកាប៊ុល ជាអ្វីដែលប៉ាគីស្ថានមានអំណាចពេញលេញក្នុងការឆ្លើយតប"។

ក្រុមជីហាដប៉ាគីស្ថានដ៏សំខាន់ ឈ្មោះ Tehreek-e-Taliban Pakistan ឬត្រូវគេស្គាល់ថា ក្រុមតាលីបង់ប៉ាគីស្ថាន បានបដិសេធការជាប់ពាក់ព័ន្ធក្នុងការវាយប្រហារនេះ។ ក្នុងប៉ុន្មានឆ្នាំថ្មីៗ ក្រុមសកម្មប្រយុទ្ធមួយនេះបានផ្តោតការវាយប្រហាររបស់ពួកគេលើកងកម្លាំងសន្តិសុខ។ យោងតាមក្រុមទីតាំងជម្លោះប្រដាប់អាវុធ និងទិន្នន័យព្រឹត្តិការណ៍ ដែលជាស្ថាប័នតាមដានការវាយប្រហារនានា បានឱ្យដឹងថា ជនស៊ីវិលមិនដែលរងការវាយប្រហារទេក្នុងទីក្រុងអ៊ីស្លាម៉ាបាដ អស់ ១ទស្សវត្សមកហើយ៕