នាយករដ្ឋមន្ត្រីប្រទេសម៉ាលី ឧត្តមសេនីយ Abdoulaye Maiga កាលពីថ្ងៃអង្គារ ទី១១ ខែវិច្ឆិកា បានចោទប្រកាន់ប្រទេសបារាំង និងប្រទេសអាល់ហ្សេរី ថាបានគាំទ្រក្រុមភេរវករ ខណៈមន្ត្រីការពារជាតិមកពីប្រទេសរុស្ស៊ី នីហ្សេរ និងបួគីណាហ្វាសូ បានជួបប្រជុំគ្នានៅក្នុងរដ្ឋធានីសម្រាប់ការតាំងពិពណ៌យោធា ដែលបង្ហាញពីសព្វាវុធ និងយុទ្ធោបករណ៍។

លោក Maiga បានថ្លែងសុន្ទរកថានៅឯពិធីបើកការតាំងពិព័រណ៍យោធា Bamako ជាកន្លែងដែលយានដ្រូន រ៉ុក្កែត និងអាវុធ ត្រូវបានដាក់តាំងបង្ហាញ។ លោក Maiga បាននិយាយប្រឆាំងនឹងអតីតអំណាចអាណានិគមរបស់ប្រទេសម៉ាលី និងអ្នកជិតខាងខ្លួនថា «ថ្ងៃនេះ អ្នកទាំងឡាយនៅខាងក្រុមភេរវករ ដែលកំពុងធ្វើប្រតិបត្តិការនៅក្នុងតំបន់របស់យើង គឺរបបយោធាបារាំង និងរបបយោធាអាល់ហ្សេរី»។

ព្រឹត្តិការណ៍នេះ បាននាំមករួមគ្នាជាមួយអនុរដ្ឋមន្ត្រីក្រសួងការពារជាតិរុស្ស៊ី លោក Yunus-Bek Yevkurov អគ្គលេខាធិការក្រសួងការពារជាតិនីហ្សេរ លោក Sani Katche និងរដ្ឋមន្ត្រីក្រសួងការពារជាតិបួគីណាហ្វាសូ ឧត្តមសេនីយ៍ Celestin Simpore រួមជាមួយនឹងមន្ត្រីដទៃទៀត។

ការតាំងពិព័រណ៌នេះ បានបង្ហាញយុទ្ធោបករណ៍ រួមទាំងប្រព័ន្ធសព្វាវុធ និងយានរថពាសដែក។ ប្រទេសម៉ាលី នីហ្សេរ និងប្រទេសបួគីណាហ្វាសូ សុទ្ធតែបានជួបប្រទះការធ្វើរដ្ឋប្រហារយោធាក្នុងប៉ុន្មានឆ្នាំថ្មីៗនេះ ហើយបានងាកចេញពីអតីតសម្ព័ន្ធមិត្តបារាំង ឆ្ពោះទៅរកទំនាក់ទំនងកាន់តែជិតស្និទ្ធជាមួយរុស្ស៊ី។