អាកាសធាតុត្រជាក់ខ្លាំងដំបូងក្នុងរដូវរងានេះ បានធ្វើឱ្យផ្នែកមួយចំនួននៃភាគអាគ្នេយ៍សហរដ្ឋអាមេរិក ធ្លាក់ទៅក្នុងសីតុណ្ហភាពទាបបំផុត កាលពីថ្ងៃអង្គារ (១១ វិច្ឆិកា) បណ្ដាលឱ្យមនុស្ស ១៨លាននាក់ ស្ថិតក្រោមការព្រមានពីអាកាសធាតុដ៏ត្រជាក់ នៅទូទាំងរដ្ឋ Alabama, Florida និង Georgia។ ទន្ទឹមនឹងនេះ ផ្នែកមួយចំនួនតាមបណ្តោយតំបន់ Great Lake ដ៏ធំល្វឹងល្វើយនៅភាគឦសាន ត្រូវគ្របដណ្តប់ទៅដោយព្រិលយ៉ាងក្រាស់ ខណៈខ្យល់ត្រជាក់បានបោកបក់ឆ្លងកាត់ទីនោះ។

ការប៉ះដោយផ្ទាល់នៃខ្យល់អាកទិក — ដែលទៅដល់ផ្នែកពីរភាគបីនៃប្រទេស — បានធ្វើដំណើរទៅទិសខាងកើតនិងចុងអាគ្នេយ៍ ចេញពីវាលទំនាបភាគខាងជើង ដែលបានរងភាពត្រជាក់ខ្លាំងនិងព្រិលធ្លាក់ កាលពីចុងសប្តាហ៍កន្លងទៅ។ សម្រាប់ផ្នែកភាគច្រើននៃប៉ែកអាគ្នេយ៍អាមេរិក ក្នុងថ្ងៃអង្គារនោះ ការផ្លាស់ប្តូរភ្លាមៗបានក្លាយទៅជាសីតុណ្ហភាពរដូវរងាដ៏គួរឱ្យភ្ញាក់ផ្អើល បន្ទាប់ពីអាកាសធាតុល្អពី ២១ ទៅ ២៧អង្សាសេ ក្នុងប៉ុន្មានថ្ងៃថ្មីៗនេះ។

លោក Scott Kleebauer អ្នកជំនាញខាងឧតុនិយមបាននិយាយថា កំណត់ត្រាសីតុណ្ហភាពប្រចាំថ្ងៃមួយចំនួនត្រូវ "បំបែកទាំងស្រុង" រួមទាំងកម្រិតទាប -២អង្សាសេ នៅអាកាសយានដ្ឋានទីក្រុង Jacksonville រដ្ឋ Florida កាលពីព្រឹកថ្ងៃអង្គារ។

ភាគអាគ្នេយ៍នៃសហរដ្ឋអាមេរិក ត្រូវព្យាករថានឹងប្រឈមអាកាសធាតុត្រជាក់ជាងធម្មតារយៈពេលច្រើនថ្ងៃ មុនពេលឡើងកម្ដៅមកវិញនៅក្នុងសប្តាហ៍បន្ទាប់៕