រូបភាពផ្កាយរណបដែលត្រូវពិនិត្យដោយបណ្ដាញផ្ទៀងផ្ទាត់របស់សារព័ត៌មានអង់គ្លេស BBC បានបង្ហាញថា អ៊ីស្រាអែល បានកម្ទេចអគារជាង ១.៥០០ខ្នង នៅតំបន់ហ្កាហ្សា ដែលនៅតែស្ថិតក្រោមការគ្រប់គ្រងរបស់ខ្លួន ចាប់តាំងពីបទឈប់បាញ់ជាមួយក្រុមហាម៉ាស បានចាប់ផ្តើមនៅថ្ងៃទី១០ ខែតុលា ឆ្នាំ២០២៥ នេះមក។

រូបថតថ្មីចុងក្រោយបំផុត - ដែលត្រូវថតបាននៅថ្ងៃទី៨ ខែវិច្ឆិកា - បង្ហាញឱ្យឃើញថា សង្កាត់ទាំងមូលដែលគ្រប់គ្រងដោយកងកម្លាំងការពារអ៊ីស្រាអែល (IDF) ត្រូវបំផ្លាញក្នុងពេលតិចជាង ១ខែ ដោយជាក់ស្តែងតាមរយៈការវាយកម្ទេច។

BBC និយាយថា ចំនួនពិតប្រាកដនៃអគារដែលត្រូវបានបំផ្លាញ អាចខ្ពស់ជាងនេះឆ្ងាយណាស់ ដោយសាររូបភាពផ្កាយរណបលើតំបន់មួយចំនួន មិនអាចប្រើសម្រាប់ការវាយតម្លៃបានទេ។

អ្នកជំនាញមួយចំនួនអះអាងថា ការវាយកម្ទេចអគារបែបនេះ អាចនឹងបំពានលើលក្ខខណ្ឌបទឈប់បាញ់ ដែលសម្របសម្រួលដោយសហរដ្ឋអាមេរិក អេហ្ស៊ីប កាតា និងទួរគី។ ប៉ុន្តែអ្នកនាំពាក្យ IDF បានប្រាប់ BBC ថា ខ្លួនកំពុងធ្វើសកម្មភាព "ស្របតាមក្របខណ្ឌបទឈប់បាញ់" ។

គួរឱ្យដឹងថា ផែនការសន្តិភាព ២០ចំណុចរបស់លោកប្រធានាធិបតីអាមេរិក Donald Trump សម្រាប់តំបន់ហ្កាហ្សា ដែលជាមូលដ្ឋានសម្រាប់បទឈប់បាញ់ បាននិយាយថា "ប្រតិបត្តិការយោធាទាំងអស់ រួមទាំងការទម្លាក់គ្រាប់បែកពីលើអាកាស និងការបាញ់យុទ្ធោបករណ៍នានា នឹងត្រូវផ្អាក"។ លោកបានអះអាងម្តងហើយម្តងទៀតថា "សង្រ្គាមបានបញ្ចប់ហើយ"៕