មេបញ្ជាការយោធាជាន់ខ្ពស់របស់អ៊ុយក្រែនបានទទួលស្គាល់ថា ស្ថានភាពរបស់កងទ័ព «កាន់តែយ៉ាប់យ៉ឺនទៅៗ» នៅក្នុងផ្នែកមួយចំនួននៃតំបន់ Zaporizhia ភាគខាងត្បូង ជាកន្លែងដែលកងកម្លាំងអ៊ុយក្រែន បានដកខ្លួនចេញពីភូមិចំនួនប្រាំ ក្រោយការប្រយុទ្ធគ្នាយ៉ាងខ្លាំងក្លាប្រឆាំងកងទ័ពរុស្ស៊ី។

ព័ត៌មានអំពីឧសគ្គក្នុងតំបន់ Zaporizhia នៅអ៊ុយក្រែនភាគអាគ្នេយ៍ កើតឡើងខណៈរុស្ស៊ីបាននិយាយកាលពីថ្ងៃអង្គារថា កងកម្លាំងរបស់ខ្លួនបានរុលចូលជ្រៅទៅក្នុងទីក្រុង Pokrovsk និងទីក្រុង Kupiansk ភាគខាងកើតអ៊ុយក្រែន។

វីដេអូ ដែលបានចេញផ្សាយដោយអ្នកសរសេរប្លុកសង្គ្រាមរុស្ស៊ី បង្ហាញពីកងទ័ពរបស់ទីក្រុងមូស្គូ ជិះម៉ូតូ ធ្វើដំណើរក្នុងរថយន្តដែលរងការខូចខាត ហើយបានអង្គុយនៅលើដំបូលរថយន្តយោធា ខណៈពួកគេបានចូលទៅក្នុងទីក្រុង Pokrovsk ។

មេបញ្ជាការកងកម្លាំងប្រដាប់អាវុធអ៊ុយក្រែន លោក Oleksandr Syrskii បាននិយាយអំពីការប្រយុទ្ធគ្នានៅតំបន់ Zaporizhia កាលពីថ្ងៃអង្គារថា «សត្រូវបានរុលចូលទៅមុខក្នុងការប្រយុទ្ធគ្នាយ៉ាងខ្លាំងក្លា និងដណ្តើមបានទីតាំងលំនៅឋានចំនួនបីកន្លែង» ។

កងទ័ពអ៊ុយក្រែនបាននិយាយថា បទបញ្ជាឱ្យដកខ្លួនចេញពីភូមិចំនួនប្រាំក្នុងតំបន់ Zaporizhia ត្រូវបានផ្តល់ឱ្យបន្ទាប់ពី «ការបំផ្លិចបំផ្លាញទីជម្រក និងបន្ទាយទាំងអស់» ក្រោយការវាយប្រហារដោយកាំភ្លើងធំរបស់រុស្ស៊ី។ គ្រាប់ផ្លោងប្រមាណ២.០០០គ្រាប់ត្រូវបានបាញ់ទៅលើទីតាំងរបស់អ៊ុយក្រែន។