ប្រទេសលីប៊ី ត្រូវបានជំរុញនៅក្នុងកិច្ចប្រជុំអង្គការសហប្រជាជាតិកាលពីថ្ងៃអង្គារ ឲ្យបិទមជ្ឈមណ្ឌលឃុំឃាំង ដែលក្រុមសិទ្ធិមនុស្សនិយាយថា ជនអន្តោប្រវេសន៍ និងជនភៀសខ្លួន ត្រូវបានគេធ្វើទារុណកម្ម រំលោភបំពាន និងជួនកាលត្រូវបានគេសម្លាប់។

រដ្ឋជាច្រើនរួមមានចក្រភពអង់គ្លេស អេស្ប៉ាញ ន័រវែស និងសៀរ៉ាឡេអូន បានលើកឡើងពីការព្រួយបារម្ភនៅក្នុងកិច្ចប្រជុំនៅទីក្រុងហ្សឺណែវអំពីការប្រព្រឹត្តចំពោះជនអន្តោប្រវេសន៍ នៅក្នុងប្រទេសលីប៊ី ដែលជាផ្លូវឆ្លងកាត់ដ៏សំខាន់សម្រាប់ជនជាតិអាហ្វ្រិក ដែលរត់គេចពីជម្លោះ និងភាពក្រីក្រ ទៅកាន់ទ្វីបអឺរ៉ុប។ យោងតាមសំណុំរឿងតុលាការហូឡង់មួយ ជនអន្តោប្រវេសន៍ចំនួន ត្រូវបានឃុំខ្លួន នៅក្នុងឃ្លាំងដោយអ្នកជួញដូរមនុស្ស ជាកន្លែងដែលពួកគេ ត្រូវបានទទួលរងនូវអំពើហិង្សា និងការជំរិតទារប្រាក់។

ឯកអគ្គរដ្ឋទូតន័រវែសលោក Tormod Endresen បានអំពាវនាវឲ្យមានការការពារជនអន្តោប្រវេសន៍ ដែលងាយរងគ្រោះ និងបញ្ចប់ការឃុំឃាំងដោយបំពាន។ ឯកអគ្គរដ្ឋទូតសិទ្ធិមនុស្សរបស់ចក្រភពអង់គ្លេស លោកស្រី Eleanor Sanders ក៏បានលើកឡើងពីការអំពាវនាវនោះដែរ ហើយក៏បានស្វែងរកការចូលដោយគ្មានការរឹតត្បិតសម្រាប់អង្គការសហប្រជាជាតិ និងក្រុមផ្សេងទៀត ទៅកាន់ផ្នូរធំៗនៅក្នុងប្រទេសនេះ។ ទីភ្នាក់ងារអង្គការសហប្រជាជាតិមួយ បាននិយាយថា សាកសពជនអន្តោប្រវេសន៍មួយចំនួនដែលត្រូវបានរកឃើញនៅក្នុងផ្នូរធំៗ កាលពីដើមឆ្នាំនេះ មានរបួសដោយសារគ្រាប់កាំភ្លើង។

នៅក្នុងលិខិតចំហមួយផ្ញើទៅកាន់អាជ្ញាធរលីប៊ីដែលបានបោះពុម្ពផ្សាយស្របគ្នានឹងការពិនិត្យឡើងវិញរបស់អង្គការសហប្រជាជាតិ ក្រុមសិទ្ធិមនុស្សបានអំពាវនាវឲ្យមានកំណែទម្រង់ ដោយនិយាយថា ក្រុមប្រដាប់អាវុធ កំពុងធ្វើប្រតិបត្តិការដោយគ្មានទោសពៃរ៍ រារាំងតុលាការ និងប្រព្រឹត្តការរំលោភបំពានយ៉ាងទូលំទូលាយ៕