រដ្ឋមន្ត្រីការបរទេស លោក Jean-Noel Barrot កាលពីថ្ងៃអង្គារ (ទី១១ ខែវិច្ឆិកា) បានប្រាប់ឲ្យដឹងថា ប្រទេសបារាំងព្រួយបារម្ភ អំពីប្រតិបត្តិការយោធារបស់សហរដ្ឋអាមេរិក នៅតំបន់ការ៉ាអ៊ីប ដ្បិតការធ្វើបែបនោះបំពានច្បាប់អន្តរជាតិ។

គួរដឹងថា រហូតមកដល់ពេលនេះ យោធាសហរដ្ឋអាមេរិកបានធ្វើការវាយប្រហារយ៉ាងហោចណាស់ចំនួន ១៩ដង ប្រឆាំងនឹងនាវាដែលសង្ស័យថា មានគ្រឿងញៀន នៅក្នុងតំបន់ការ៉ាអ៊ីប និងម្ដុំឆ្នេរប៉ាស៊ីហ្វិករបស់តំបន់អាមេរិកឡាទីន ដោយបានសម្លាប់មនុស្សយ៉ាងហោចណាស់ ៧៦នាក់។

នៅខាងក្រៅកិច្ចប្រជុំរដ្ឋមន្ត្រីការបរទេសនៃក្រុមប្រទេសទាំង ៧ ឬ G7 នៅប្រទេសកាណាដា លោក Barrot បាននិយាយថា៖ «យើងមានក្ដីបារម្ភ អំពីប្រតិបត្តិការយោធា នៅក្នុងតំបន់ការ៉ាអ៊ីប ដ្បិតការធ្វើនោះបំពានច្បាប់អន្តរជាតិ ហើយពីព្រោះតែប្រទេសបារាំងមានវត្តមាននៅក្នុងតំបន់នេះ តាមរយៈដែនដីក្រៅប្រទេស ដែលមានជនរួមជាតិរបស់យើងជាងមួយលាននាក់រស់នៅ»។

លោករដ្ឋាមន្ត្រីរូបនេះ បានបញ្ជាក់បន្ថែមថា៖ «ហេតុដូច្នេះ ពួកគេអាចរងផលប៉ះពាល់ដោយសារអស្ថិរភាពបណ្តាលមកពីការកើនឡើងនូវភាពតានតឹងណាមួយដែលយើងពិតជាចង់ជៀសឲ្យផុត»។

មន្ត្រីសហរដ្ឋអាមេរិក បានឲ្យដឹងកាលពីថ្ងៃអង្គារថា នាវាផ្ទុកយន្តហោះដ៏ធំបំផុតរបស់ពិភពលោក គឺ Gerald Ford បានផ្លាស់ទីចូលទៅកាន់តំបន់នេះ ដោយបន្ថែមពីលើនាវាចម្បាំងចំនួន ៨គ្រឿង នាវាមុជទឹកនុយក្លេអ៊ែរ ១គ្រឿង និងយន្តហោះ F-35 ដែលមានរួចហើយ នៅក្នុងតំបន់ការ៉ាអ៊ីប៕