នាថ្ងៃពុធ (ទី១២ ខែវិច្ឆិកា) នៅឯសន្និសីទសារព័ត៌មានរួមនៅទីក្រុងស៊ីដនី ជាមួយប្រធានាធិបតីឥណ្ឌូនេស៊ី លោក Prabowo Subianto នាយករដ្ឋមន្ត្រីអូស្ត្រាលី លោក Anthony Albanese បានប្រាប់ឲ្យដឹងថា ប្រទេសអូស្ត្រាលី និងឥណ្ឌូនេស៊ី បានព្រមព្រៀងគ្នាលើសន្ធិសញ្ញាសន្តិសុខថ្មី ដែលអាចឲ្យប្រទេសជិតខាងទាំង២ ពិភាក្សាគ្នាទៅវិញទៅមក ប្រសិនបើភាគីណាមួយត្រូវបានគំរាមកំហែង។

លោក Albanese ដែលបានអមលោក Prabowo ក្នុងដំណើរទៅកាន់មូលដ្ឋានទ័ពជើងទឹកអូស្ត្រាលី ក្នុងទីក្រុងនេះនោះ បាននិយាយថា សន្ធិសញ្ញានេះ គឺជាការពង្រីកបន្ថែមដ៏សំខាន់ពីលើកិច្ចព្រមព្រៀងសន្តិសុខពីមុន ដែលត្រូវបានចុះហត្ថលេខាលើកដំបូងកាលពី ៣០ឆ្នាំកន្លងទៅ ហើយក៏ប្តេជ្ញាឲ្យមានផងដែរនូវការសន្ទនាសន្តិសុខជាទៀងទាត់ រវាងមេដឹកនាំនៃភាគីទាំង ២។

លោកបានមានបន្ថែមថា៖ «ប្រសិនបើសន្តិសុខរបស់ប្រទេសណាមួយ ឬប្រទេសទាំង២ ត្រូវបានគំរាមកំហែងនោះ ការពិភាក្សា និងការពិចារណាថា តើត្រូវមានវិធានការបែបណានោះ អាចត្រូវបានធ្វើឡើងជាលក្ខណៈបុគ្គល ឬរួមគ្នា ដើម្បីដោះស្រាយការគំរាមកំហែងទាំងនោះ” ។

លោកបានបន្ថែមថា ឥណ្ឌូនេស៊ី និងអូស្ត្រាលីបានទទួលស្គាល់ថា ការធ្វើសកម្មភាពរួមគ្នា គឺជាមធ្យោបាយដ៏ល្អបំផុត ក្នុងការធានាបាននូវសន្តិភាព និងស្ថិរភាពនៅក្នុងតំបន់។

ចំណែកលោក Prabowo បានប្រាប់អ្នកសារព័ត៌មានថា សន្ធិសញ្ញានេះយល់ព្រមឲ្យមានកិច្ចសហប្រតិបត្តិការជិតស្និទ្ធ រវាងប្រទេសជិតខាងទាំង២ ក្នុងវិស័យការពារជាតិ និងសន្តិសុខ៕