នគរបាល និងក្រុមមនុស្សធម៌ស្ម័គ្រចិត្ត បានជម្លៀសជនស៊ីវិល ២២នាក់ ចេញពីទីក្រុងជួរមុខ Huliaipole និងភូមិដ្ឋានប្រជាពលរដ្ឋជាច្រើនទៀត នៅតំបន់ Zaporizhzhia របស់អ៊ុយក្រែន ពេលដែលមេបញ្ជាការជាន់ខ្ពស់អ៊ុយក្រែន និយាយថា កងកម្លំាងរុស្ស៊ី បានឆ្លៀតយកប្រយោជន៍ពីស្ថានភាពអាកាសធាតុពុំអំណោយផល ដើម្បីរុលចូលកាន់តែជ្រៅទៅក្នុងតំបន់មួយនេះ ។

ព័ត៌មានអំពីឧសគ្គក្នុងតំបន់ Zaporizhia នៅភាគអាគ្នេយ៍អ៊ុយក្រែន កើតឡើងខណៈរុស្ស៊ីបាននិយាយកាលពីថ្ងៃអង្គារថា កងកម្លាំងរបស់ខ្លួនបានរុលចូលជ្រៅទៅក្នុងទីក្រុង Pokrovsk និងទីក្រុង Kupiansk ស្ថិតនៅភាគខាងកើតអ៊ុយក្រែន។

 វីដេអូ ដែលបានចេញផ្សាយដោយអ្នកសរសេរប្លុកសង្គ្រាមរុស្ស៊ី បង្ហាញពីកងទ័ពរបស់ទីក្រុងមូស្គូ ជិះទោចចក្រយានយន្ត ធ្វើដំណើរតាមរថយន្តដែលរងការខូចខាត ហើយបានអង្គុយនៅលើដំបូលរថយន្តយោធា ខណៈពួកគេបានចូលទៅក្នុងទីក្រុង Pokrovsk ។ 

មេបញ្ជាការកងកម្លាំងប្រដាប់អាវុធអ៊ុយក្រែន លោក Oleksandr Syrskii បាននិយាយអំពីការប្រយុទ្ធគ្នានៅតំបន់ Zaporizhia កាលពីថ្ងៃអង្គារថា សត្រូវបានរុលចូលទៅមុខក្នុងការប្រយុទ្ធគ្នាយ៉ាងខ្លាំងក្លា និងដណ្តើមបានទីតាំងលំនៅឋានចំនួន ៣កន្លែង ។

លោកបញ្ជាក់នៅលើបណ្តាញព័ត៌មានសង្គម Telegramថា ស្ថានភាពកាន់តែអាក្រក់ខ្លាំង នៅទីតាំង Oleksandrivka និងទីតាំង Huliaipole ហើយទាហានរបស់លោក កំពុងតែប្រយុទ្ធគ្នាដោយក្លាហាន សម្រាប់ភូមិ ២កន្លែងនៅភាគឦសានទីក្រុង Huliaipole ។

លោកយាយ Kateryna Ishchenko ដែលជាអ្នកជម្លៀសខ្លួនវ័យ ៧៨ឆ្នាំម្នាក់ និយាយថា លោកយាយបានឮថា កងកម្លាំងរុស្ស៊ី បានរុលចូលមកជិតភូមិ Uspenivka ។

នគរបាល និងក្រុមស្ម័គ្រចិត្ត បានជម្លៀសមនុស្សចាស់ និងជនស៊ីវិលមិនអាចធ្វើដំណើរបាន ក្នុងនោះ ក្រុមស្ម័គ្រចិត្ត បានព្រមានពីការគំរាមកំហែងនៃការវាយប្រហារដោយយានដ្រូន អំឡុងពេលប្រតិបត្តិការជម្លៀសខ្លួននេះ ។

ក្រុមអាជ្ញាធរក្នុងស្រុក និយាយថា មនុស្សប្រហែល ៥០០នាក់ បន្តស្នាក់នៅក្នុងទីក្រុង Huliaipole ដែលកាលពីមុនសង្រ្គាម មានពលរដ្ឋរស់នៅជិត ១៥.០០០នាក់ ហើយពុំមានក្មេងៗសេសសល់នៅក្នុងទីក្រុងមួយនេះឡើយ ៕