នៅថ្ងៃពុធនេះ ចិននិយាយថា ខ្លួនស្វាគមន៍ និងគាំទ្រការដាក់ចេញរបស់ប្រេស៊ីលនូវគំនិតផ្តួចផ្តើម “មូលនិធិព្រៃឈើជារៀងរហូត(TFFF)” នៅកិច្ចប្រជុំកំពូលអាកាសធាតុ COP30 របស់អង្គការសហប្រជាជាតិ(UN) ។

 លោក Guo Jiakun គឺជាអ្នកនាំពាក្យក្រសួងការបរទេសចិន និយាយនៅក្នុងសន្និសីទសារព័ត៌មានថា ពួកយើងរំពឹងថា គំនិតផ្តួចផ្តើមនេះនឹងដើរតួវិជ្ជមាន ហើយជំរុញឲ្យប្រទេសអភិវឌ្ឍន៍ ផ្តល់ការគាំទ្រហិរញ្ញវត្ថុគ្រប់គ្រាន់ ដើម្បីជួយប្រទេសកំពុងអភិវឌ្ឍន៍កាត់បន្ថយការកាប់បំផ្លាញព្រៃឈើ និងការខូចព្រៃឈើ ។

 ប្រេស៊ីលកំពុងជំរុញប្រទេសនៅកិច្ចប្រជុំកំពូល COP30 រួមចំណែកមូលនិធិ TFFF ទើបដាក់ចេញថ្មី ដែលមានគោលបំណងរៃអង្គាសប្រាក់ ២៥ពាន់លានដុល្លារ នៅក្នុងមូលនិធិរបស់រដ្ឋាភិបាល និងសប្បុរសធម៌ ដើម្បីកៀរគរប្រាក់ឯកជនឲ្យបានចំនួន ១០០ ពាន់លានដុល្លារបន្ថែមទៀត ។

 ស្របពេលដែលព្យុះទីហ្វុង វាយប្រហារទូទាំងតំបន់អាស៊ី-អាគ្នេយ៍ក្នុងសប្តាហ៍នេះ ក៏ដូចជាតំបន់មួយចំនួននៅប្រទេសហ្សាម៉ាអ៊ីក និងប្រេស៊ីល គណៈប្រតិភូនៅកិច្ចប្រជុំកំពូល COP30 ក្នុងប្រទេសប្រេស៊ីល កំពុងព្យាយាមរកវិធីសាស្រ្ត ជួយឲ្យបានល្អបំផុត ដើម្បីជួយប្រទេសងាយរងគ្រោះ ធន់នឹងអាកាសធាតុអាក្រក់ និងស្ថានភាពអាកាសធាតុធ្ងន់ធ្ងរផ្សេងទៀត ៕