យោធាអាមេរិកកំពុងត្រិះរិះថា តើត្រូវសាងសង់មូលដ្ឋានបណ្ដោះអាសន្នដែលអាចផ្ដល់ជម្រកជ្រកកោនដល់មនុស្ស ១០.០០០នាក់ នៅជិតតំបន់ហ្កាហ្សាស្ទ្រីបដែរ ឬអត់ ដោយនេះគឺជាផ្នែកនៃការជំរុញរបស់ខ្លួនឲ្យមានកងកម្លាំងរក្សាស្ថិរភាពមកពីប្រទេសផ្សេងទៀត ដើម្បីតាមដានបទឈប់បាញ់ រវាងអ៊ីស្រាអែល និងក្រុមហាម៉ាស។

បើយោងតាមសំណើសុំព័ត៌មានដែលបានផ្ញើទៅកាន់អ្នកម៉ៅការដែលទទួលបានសិទ្ធិ និងត្រូវបានឃើញដោយសារព័ត៌មាន Bloomberg News បានឲ្យដឹងថា កងទ័ពជើងទឹកកំពុងស្វែងរកការប៉ាន់ប្រមាណតម្លៃពីបញ្ជីក្រុមហ៊ុន ដែលមានលក្ខណៈសម្បត្តិគ្រប់គ្រាន់ជាមុន ដើម្បីសាងសង់ «មូលដ្ឋានប្រតិបត្តិការយោធាបណ្តោះអាសន្នទ្រទ្រង់ខ្លួនឯង ដែលអាចគាំទ្របុគ្គលិក ១០.០០០នាក់ និងផ្តល់ទំហំការិយាល័យ ១០.០០០ហ្វីតការ៉េ (ប្រមាណជា ៩២៩ម៉ែត្រការ៉េ) សម្រាប់រយៈពេល ១២ខែ»។

សំណើសុំព័ត៌មាននេះ កំណត់លទ្ធភាពនៃទីតាំងនេះថា ជាទីតាំង «នៅជិតតំបន់ហ្កាហ្សា ប្រទេសអ៊ីស្រាអែល»។ បើយោងតាមបុគ្គល ២នាក់ ដែលដឹងពីបញ្ហា និងដែលបាននិយាយក្នុងលក្ខខណ្ឌមិនបញ្ចេញឈ្មោះ ដោយសារជាការពិភាក្សាសម្ងាត់ បានឲ្យដឹងថា វាត្រូវបានផ្ញើនៅថ្ងៃទី៣១ ខែតុលា។ ការឆ្លើយតបគ្រោងនឹងមាននៅថ្ងៃទី៣ ខែវិច្ឆិកា។

គួរបញ្ជាក់ថា សហរដ្ឋអាមេរិកបាននិងកំពុងស្វែងរកការគាំទ្រពីអន្តរជាតិ សម្រាប់សំណើបញ្ជូនកងទ័ពបរទេសទៅកាន់តំបន់ហ្កាហ្សា ដើម្បីជួយធានាបទឈប់បាញ់ដ៏ផុយស្រួយ រវាងអ៊ីស្រាអែល និងក្រុមហាម៉ាស់ ដែលបានចុះហត្ថលេខាកាលពីខែមុន។

កងទ័ពទាំងនោះ ដែលត្រូវបានគេដាក់ឈ្មោះថា កងកម្លាំងរក្សាស្ថិរភាពអន្តរជាតិ ឬ ISF នឹងធ្វើការជាមួយអ៊ីស្រាអែល និងអេហ្ស៊ីប ដើម្បីធានាសន្តិសុខដល់ដែនដីនោះ និងដើម្បីអាចឲ្យមានកិច្ចប្រឹងប្រែងកសាងឡើងវិញ បន្ទាប់ពីមានសង្រ្គាមជាង ២ឆ្នាំ រវាងអ៊ីស្រាអែល និងក្រុមហាម៉ាស៕