វិមានក្រឹមឡាំង នៅថ្ងៃពុធ (ទី១២ ខែវិច្ឆិាក) នេះ បានឲ្យដឹងថា មានការប្រាស្រ័យទាក់ទងគ្នា រវាងទីប្រឹក្សាសន្តិសុខជាតិរបស់ចក្រភពអង់គ្លេស លោក Jonathan Powell និងជំនួយការគោលនយោបាយការបរទេសរបស់វិមានក្រឹមឡាំង លោក Yuri Ushakov ប៉ុន្តែថា ការសន្ទនាមិនដំណើរការយ៉ាងល្អប្រសើរនោះឡើយ។

សារព័ត៌មាន Financial Times បានរាយការណ៍ថា លោក Powell បានព្យាយាមបើកបណ្ដាញទំនាក់ទំនងទៅកាន់វិមានក្រឹមឡាំង ពីព្រោះចក្រភពអង់គ្លេស និងសម្ព័ន្ធមិត្តអឺរ៉ុបរបស់ខ្លួន បារម្ភថា រដ្ឋបាលរបស់ប្រធានាធិបតីសហរដ្ឋអាមេរិក លោក Donald Trump អាចទុកផលប្រយោជន៍របស់ពួកគេដោយឡែក ជុំវិញបញ្ហាអ៊ុយក្រែន។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា អង់គ្លេសមិនបានបង្ហាញបំណងចង់ស្តាប់ជំហររបស់រុស្ស៊ី ជុំវិញជម្លោះអ៊ុយក្រែននោះឡើយ។

លោក Peskov បានបញ្ជាក់ថា៖ «ពិតជាមានការទាក់ទងគ្នាមែន។ ការសន្ទនាបានកើតឡើង ប៉ុន្តែវាមិនបានបន្តនោះឡើយ»។ តែយ៉ាងណាក្ដី លោកមិនបាននិយាយថា តើការសន្ទនានោះបានកើតឡើងនៅពេលណាទេ។

អ្នកនាំពាក្យរូបនេះបានបន្ថេមថា៖ «ក្នុងអំឡុងពេលមានការប្រាស្រ័យទាក់ទងគ្នានោះ បំណងប្រាថ្នាដ៏ខ្លាំងក្លារបស់អ្នកសន្ទនាម្ខាង គឺចង់និយាយអំពីជំហររបស់បណ្ដាប្រទេសអឺរ៉ុប តែខ្វះនូវចេតនា ឬឆន្ទៈ ក្នុងការស្តាប់ពីជំហររបស់យើង»៕