គណៈកម្មការអឺរ៉ុប កាលពីថ្ងៃអង្គារ (ទី១១ ខែវិច្ឆិកា) បានប្រាប់ឲ្យដឹងថា ប្រទេសក្រិក ស៊ីប អេស្ប៉ាញ និងអ៊ីតាលី នឹងមានសិទ្ធិទទួលបានជំនួយ ដើម្បីដោះស្រាយសម្ពាធទេសន្តរប្រវេសន៍ ក្រោមយន្តការថ្មីរបស់សហភាពអឺរ៉ុប (EU) នៅពេលដែលកិច្ចព្រមព្រៀងរបស់ប្លុក ស្តីពីជនអន្តោប្រវេសន៍ និងការសុំសិទ្ធិជ្រកកោន ចូលជាធរមាននៅពាក់កណ្តាលឆ្នាំ២០២៦។

ជាផ្នែកនៃកំណែទម្រង់ទេសន្តរប្រវេសន៍របស់ EU ឥឡូវនេះ រដ្ឋជាសមាជិកត្រូវតែសម្រេចថា តើត្រូវជួយយ៉ាងល្អបំផុតដោយរបៀបណា តាមរយៈយន្តការ ដែលគេស្គាល់ថាជា «ក្រុមសាមគ្គីភាព» ដោយស្នើផ្តល់ការទទួលយកជនអន្តោប្រវេសន៍កាន់តែច្រើន ដោយផ្តល់ប្រាក់បន្ថែមដល់ប្រទេសមេឌីទែរ៉ាណេទាំង៤ ឬដោយវិធានការផ្សេងទៀត។

គណៈកម្មការបានឲ្យដឹងថា បើទោះបីជាការឆ្លងកាត់ព្រំដែនខុសច្បាប់ បានថយចុះ ៣៥ភាគរយ ក្នុងរយៈពេលចន្លោះខែកក្កដា ឆ្នាំ២០២៤ ដល់ខែមិថុនា ឆ្នាំ២០២៥ ប៉ុន្តែបញ្ហាប្រឈមនៅតែមានដដែល។

គណៈកម្មការបានបន្ថែមថា៖ «ប្រទេសក្រិក និងស៊ីប ស្ថិតនៅក្រោមសម្ពាធទេសន្តរប្រវេសន៍ ដោយសារកម្រិតនៃជនអន្តោប្រវេសន៍ច្រើនពេក កាលពីឆ្នាំមុន។ អេស្ប៉ាញ និងអ៊ីតាលីក៏ស្ថិតនៅក្រោមសម្ពាធទេសន្តរប្រវេសន៍ ដោយសារចំនួនជនអន្តោប្រវេសន៍ច្រើនជ្រុល បន្ទាប់ពីមានការស្វែងរក និងជួយសង្គ្រោះ នៅសមុទ្រក្នុងរយៈពេលដូចគ្នា»។

ជាមួយគ្នានេះ គណៈកម្មាការក៏បានឲ្យដឹងទៀតថា បែលហ្ស៊ិក ប៊ុលហ្គារី ក្រូអាត អេស្តូនី បារាំង ហ្វាំងឡង់ អាល្លឺម៉ង់ អៀរឡង់ ឡាតវី លីទុយអានី ហូឡង់ និងប៉ូឡូញ ទំនងជាប្រឈមនឹងសម្ពាធទេសន្តរប្រវេសន៍ ហើយនឹងទទួលបានលទ្ធភាពពិសេសចូលទៅកាន់កម្មវិធី និងប្រភពគាំទ្រទេសន្តរប្រវេសន៍របស់ប្លុក៕