ទីភ្នាក់ងារអង្គការសហប្រជាជាតិ (UN) ចំនួន ២ នៅថ្ងៃពុធ (ទី១២ ខែវិច្ឆិកា) នេះ បានព្រមានថា មនុស្សរាប់លាននាក់បន្ថែមទៀត ប្រឈមនឹងស្ថានភាពទុរ្ភិក្សនៅតំបន់មានវិបត្តិយ៉ាងហោចណាស់រាប់សិប ជុំវិញពិភពលោក ក្នុងនោះរួមទាំងនៅប្រទេសស៊ូដង់ និងតំបន់ហ្កាហ្សាផងដែរ ដោយបានអំពាវនាវរកមូលនិធិ ដើម្បីដោះស្រាយកង្វះខាត ស្របពេលមានការកាត់បន្ថយជំនួយអន្តរជាតិ។

នៅក្នុងរបាយការណ៍រួម កម្មវិធីស្បៀងអាហារពិភពលោក (WFP) និងអង្គការស្បៀងអាហារ និងកសិកម្ម (FAO) ក៏បានបញ្ចូលហៃទី ម៉ាលី ស៊ូដង់ខាងត្បូង និងយេម៉ែនទៅក្នុងបញ្ជីប្រទេសដែលប្រឈមនឹង «ហានិភ័យជិតកើតមានគ្រោះមហន្តរាយនៃភាពអត់ឃ្លាន» ដែលមានន័យថា គ្រោះទុរ្ភិក្ស។

ជាមួយគ្នានេះ សេចក្ដីថ្លែងការណ៍នោះ បានឲ្យដឹងទៀតថា ស្ថានភាពអត់ឃ្លាន នៅក្នុងប្រទេសចំនួន ៦បន្ថែមទៀត គឺអាហ្វហ្គានីស្ថាន សាធារណរដ្ឋប្រជាធិបតេយ្យកុងហ្គោ មីយ៉ាន់ម៉ានី ហ្សេរីយ៉ា សូម៉ាលី និងស៊ីរី ត្រូវបានចាត់ទុកថា ជា «ការព្រួយបារម្ភខ្ពស់»។

ទាំអ WFP និង FAO បានបញ្ជាក់ថា ពាក់ព័ន្ធនឹងស្ថានភាពនេះ កង្វះខាតមូលនិធិ សម្រាប់ជំនួយមនុស្សធម៌ «កំពុងធ្វើឲ្យមានការលំបាកយ៉ាងធ្ងន់ធ្ងរដល់ការឆ្លើយតបបន្ទាន់ ដោយជំរុញឲ្យមានការកាត់បរិមាណអាហារយ៉ាងច្រើន និងកាត់បន្ថយលទ្ធភាពទទួលបានអាហារ សម្រាប់ក្រុមមនុស្សងាយរងគ្រោះបំផុត ដោយជំនួយស្បៀងអាហារជនភៀសខ្លួន ស្ថិតក្នុងការរឹតត្បិតយ៉ាងខ្លាំង»។

ដោយអំពាវនាវរកជំនួយបន្ថែមពីរដ្ឋាភិបាលនានា និងម្ចាស់ជំនួយផ្សេងទៀត WFP និង FAO បានឲ្យដឹងថា គិតត្រឹមដំណាច់ខែតុលា មានទឹកប្រាក់តែ ១០,៥ពាន់លានដុល្លារប៉ុណ្ណោះដែលទទួលបានពីចំនួនប៉ាន់ស្មាន ២៩ពាន់លានដុល្លារដែលត្រូវការ ដើម្បីជួយមនុស្សប្រឈមគ្រោះថ្នាក់បំផុត៕