អ្នកស្រី Hanan al-Joujou ជាស្រ្តីជាម្តាយវ័យ ៣១ឆ្នាំមួយរូប បញ្ចុកចំណីអាហារកូន ៣នាក់របស់គាត់នៅទីងងឹត ដោយប្រើពិលបញ្ចាំងភ្លើង ស្របពេលគ្មានចរន្តអគ្គិសនីនៅតំបន់ហ្កាហ្សា បើទោះបីជាក្រោយបទឈប់បាញ់រវាងអ៊ីស្រាអែល និងក្រុមហាម៉ាសក៏ដោយ ។ ពេលដែលពួកគេពុំអាចសាកថ្មពិលបាន ពួកគេនឹងចូលដេកដោយគ្មានបរិយោគអាហារអ្វីនោះឡើយ ។

អ្នកស្រី al-Joujou និយាយចង់សំដៅលើធម្មនិដ្ឋានពេលថ្ងៃអស្តង្គតរបស់មូស្លីមថា ពួកយើងនៅក្នុងភាពងងឹត ពេលដែលថ្ងៃលិច ហើយការអធិស្ឋាន Maghrib ត្រូវបានបញ្ចប់ ។

អ្នកស្រីបន្តថា បើសិនជាភ្លើងពិលមាន ពួកយើងនឹងបើកបំភ្លឺវា តែបើសិនជាគ្មានទេនោះ ពួកយើងនឹងចូលសម្រាកដោយពុំទទួលទានអ្វីនោះឡើយ ។

គ្រួសាររបស់អ្នកស្រី al-Joujou ពុំមានអគ្គិសនីប្រើប្រាស់នោះទេ ចាប់តាំងពីសង្រ្គាមផ្ទុះឡើងកាលពីរយៈពេលជាង ២ឆ្នាំមុន ដោយគ្រួសាររបស់គាត់ពឹងផ្អែកលើទៀន ពេលដែលជម្លៀសលើកដំបូងទៅកាន់ទីក្រុង Rafah ស្ថិតនៅភាគខាងត្បូងតំបន់ហ្កាហ្សា ។

សូមបញ្ជាក់ថា កាលមុនសង្រ្គាម តំបន់ហ្កាហ្សាពឹងផ្អែកភាគច្រើនលើអគ្គិសនីនាំចូលពីអ៊ីស្រាអែល បើទោះបីជាការផ្គត់ផ្គង់រង្គោះរង្គើរយ៉ាងណាក្តី ។

ពួកគេទទួលបានថាមពលអគ្គិសនី ១២០មេហ្គាវ៉ាត់ ពីអ៊ីស្រាអែល ខណៈដែលរោងចក្រថាមពលនៅដែនដីបិទច្រកមួយនេះ ផ្តល់អគ្គិសនីបាន ៦០មេហ្គាវ៉ាត់ផ្សេងទៀត ៕