រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃពុធ (១២ វិច្ឆិកា) បានរុញច្រានប្រឆាំងនឹងការរិះគន់ពីសម្ព័ន្ធមិត្តមួយចំនួនរបស់អាមេរិក ជុំវិញភាពស្របច្បាប់នៃការវាយប្រហាររបស់យោធាទីក្រុងវ៉ាស៊ីនតោន នៅតំបន់ការ៉ាអ៊ីប ដោយនិយាយថា ភាគីអឺរ៉ុបពុំមានសិទ្ធិកំណត់លើមធ្យោយការពារសន្តិសុខជាតិរបស់ទីក្រុងវ៉ាស៊ីនតោនឡើយ។

លោក Rubio បានចូលរួមកិច្ចប្រជុំក្រុមរដ្ឋមន្ត្រីការបរទេសទាំងប្រាំពីរនៃក្រុម G7 នៅក្នុងតំបន់ Niagara របស់កាណាដា ជាទីដែលកិច្ចពិភាក្សាផ្តោតលើសង្គ្រាមនៅអ៊ុយក្រែន និងហ្កាហ្សា ប៉ុន្តែប្រទេសមួយចំនួនដែលមានវត្តមាន បានលើកឡើងពីក្ដីបារម្ភរបស់ខ្លួនលើការវាយប្រហាររបស់អាមេរិក ប្រឆាំងនឹងទូកដែលរដ្ឋបាលលោកប្រធានាធិបតី Donald Trump និយាយថា កំពុងដឹកគ្រឿងញៀន។

រហូតមកដល់ពេលនេះ យោធាអាមេរិកបានធ្វើការវាយប្រហារយ៉ាងតិច ១៩ដងមកហើយ ប្រឆាំងនឹងនាវាដែលសង្ស័យថាដឹកគ្រឿងញៀននៅតំបន់ការ៉ាអ៊ីប និងនៅក្រៅឆ្នេរសមុទ្រប៉ាស៊ីហ្វិកនៃអាមេរិកឡាទីន ដោយបានសម្លាប់មនុស្សជិត ៨០នាក់។ នៅពេលចាប់ផ្តើមនៃកិច្ចប្រជុំ G7 លោករដ្ឋមន្ត្រីការបរទេសបារាំង Jean-Noel Barrot បានរិះគន់ថា ការវាយប្រហារនេះ "បំពានច្បាប់អន្តរជាតិ" និងកំពុងមានការព្រួយបារម្ភចំពោះទឹកដីរបស់បារាំង នៅក្នុងតំបន់នោះ។

ថ្លែងទៅកាន់អ្នកសារព័ត៌មានមុនពេលចាកចេញពីកាណាដា លោក Rubio និយាយថា ពុំមាននរណាម្នាក់បានលើកប្រតិបត្តិការនេះទៅពិភាក្សាជាមួយលោកទេនៅក្នុងជំនួប G7 ប៉ុន្តែលោកបានការពារប្រតិបត្តិការនេះថា សុទ្ធតែជាគោលដៅ “ពួកភេរវករគ្រឿងញៀន” ដោយបន្ថែម គ្រឿងញៀនទាំងនោះក៏ត្រូវដឹកជញ្ជូនតាមរយៈវ៉េណេស៊ុយអេឡាទៅកាន់អឺរ៉ុបផងដែរ ដូច្នេះសហរដ្ឋអាមេរិក គួរតែទទួលបានការអរគុណសម្រាប់រឿងនេះ។

ប្រមុខការទូតរបស់ទីក្រុងវ៉ាស៊ីនតោនរូបនេះសង្កត់ធ្ងន់ថា៖ "សហភាពអឺរ៉ុប ពុំអាចចេះតែកំណត់ថាតើច្បាប់អន្តរជាតិជាអ្វីនោះទេ ហើយប្រាកដណាស់ថា ពួកគេក៏មិនអាចកំណត់ពីមធ្យោបាយដែលសហរដ្ឋអាមេរិក ការពារសន្តិសុខជាតិរបស់ខ្លួនបាននោះដែរ"៕