ប្រទេសបារាំង នៅថ្ងៃព្រហស្បតិ៍ (១៣ វិច្ឆិកា) នេះ កំពុងប្រារព្ធខួបលើកទី១០ នៃការវាយប្រហារទីក្រុងប៉ារីស ដែលនៅពេលនោះ ខ្មាន់កាំភ្លើងក្រុមរដ្ឋអ៊ិស្លាម និងជនបំផ្ទុះគ្រាប់បែកអត្តឃាត បានសម្លាប់មនុស្ស ១៣០នាក់ នៅក្នុងការវាយប្រហារតាមហាងកាហ្វេ ភោជនីយដ្ឋាន និងសាលប្រគុំតន្ត្រី Bataclan ហើយអ្នករួចជីវិតជាច្រើន នៅតែមានស្នាមរបួសផ្លូវចិត្តពីហេតុការណ៍ដ៏រន្ធត់នេះ។

ចាប់ពីម៉ោងក្នុងស្រុក ១១:៣០នាទីព្រឹក លោកប្រធានាធិបតី អេម៉ានុយអែល ម៉ាក្រុង នឹងចូលរួមជាមួយក្រុមមន្ត្រី អ្នករួចជីវិត និងសាច់ញាតិជនរងគ្រោះ ដើម្បីឧទ្ទិសដល់វិញ្ញាណក្ខន្ធអ្នកស្លាប់និងរបួស ក្នុងការវាយប្រហារ។ ព្រឹត្តិការណ៍រំលឹកវិញ្ញាណក្ខន្ធនានា ក៏បានចាប់ផ្តើមនៅកីឡដ្ឋានធំជាងគេរបស់បារាំង ហើយបន្តទៅភោជនីយដ្ឋាន និងហាងកាហ្វេដែលត្រូវបានវាយប្រហារ ក៏ដូចជាសាលប្រគំតន្រ្តី Bataclan ផងដែរ។

គួររម្លឹកថា កាលពីថ្ងៃទី១៣ ខែវិច្ឆិកា ឆ្នាំ២០១៥ ការវាយប្រហារទាំងនោះបានចាប់ផ្តើម ដោយការបំផ្ទុះគ្រាប់បែកអត្តឃាតនៅខាងក្រៅកីឡដ្ឋានធំជាងគេឈ្មោះ Stade de France ជាទីដែលប្រធានាធិបតីបារាំងនៅពេលនោះ គឺលោក ហ្វ្រង់ស្វ័រ ហូឡង់ រួមទាំងរដ្ឋមន្ត្រីការបរទេសអាល្លឺម៉ង់ កំពុងទស្សនាការប្រកួតបាល់ទាត់មិត្តភាពអន្តរជាតិ ហើយបន្តពីក្រោយដោយការបាញ់ប្រហាររបស់ខ្មាន់កាំភ្លើងជាច្រើន នៅទីតាំងចំនួន៥ ផ្សេងទៀត កណ្តាលទីក្រុងប៉ារីស។

ក្រុមភេរវករ រដ្ឋអ៊ិស្លាម បានអះអាងទទួលខុសត្រូវចំពោះការវាយប្រហារ ហើយជំរុញឱ្យអ្នកគាំទ្ររបស់ពួកគេ វាយប្រហារបារាំង ជុំវិញការចូលរួមរបស់ប្រទេសនេះក្នុងការប្រយុទ្ធប្រឆាំងនឹងក្រុមសកម្មប្រយុទ្ធ នៅអ៊ីរ៉ាក់ និងស៊ីរី។ នោះជាឧប្បត្តិហេតុមានអ្នកស្លាប់ច្រើនបំផុតលើទឹកដីបារាំង ចាប់តាំងពីសង្គ្រាមលោកលើកទី២មក ដោយធ្វើឱ្យប៉ះពាល់ដល់ផ្លូវចិត្តប្រជាជាតិ និងជំរុញឱ្យមានវិធានការសន្តិសុខបន្ទាន់ ដែលភាគច្រើនត្រូវដាក់បញ្ចូលយ៉ាងតឹងរ៉ឹងនៅក្នុងច្បាប់ជាតិ៕