មេបញ្ជាការយោធាជាន់ខ្ពស់របស់អ៊ុយក្រែនបាននិយាយកាលពីថ្ងៃពុធសប្ដាហ៍នេះ ថា កងទ័ពរុស្ស៊ីបានវាយដណ្ដើមយកបានតំបន់លំនៅឋានចំនួនបី ក្នុងតំបន់ Zaporizhzhia ភាគខាងត្បូងរបស់ប្រទេសអ៊ុយក្រែន ខណៈកងកម្លាំងរបស់ទីក្រុងមូស្គូ ពង្រីកកិច្ចខិតខំប្រឹងប្រែងរបស់ពួកគេដើម្បីដណ្តើមយកទឹកដីអ៊ុយក្រែនបន្ថែមទៀត។

លោកឧត្តមសេនីយ៍ Oleksandr Syrskyi បានសរសេរនៅលើបណ្ដាញសង្គម Telegram ថា អ័ព្ទក្រាស់បានជួយឱ្យកងទ័ពរុស្ស៊ីជ្រៀតចូលទីតាំងរបស់អ៊ុយក្រែននៅតំបន់ Zaporizhzhia ដោយបន្ថែមថា អង្គភាពអ៊ុយក្រែនត្រូវបានជាប់រនៅក្នុងសមរភូមិដ៏លំបាក ដើម្បីរុញច្រានការវាយលុករបស់រុស្ស៊ី។ 

ទោះជាយ៉ាងណាក៏ដោយ លោកបានកត់សម្គាល់ថា សមរភូមិដ៏ខ្លាំងក្លាបំផុតនៅតែស្ថិតក្នុងទីក្រុង Pokrovsk របស់អ៊ុយក្រែនដែលត្រូវបានឡោមព័ទ្ធ នៅក្នុងតំបន់ Donetsk ភាគខាងកើត ជាកន្លែងដែលការប៉ះទង្គិចគ្នាជួរមុខជិតពាក់កណ្តាល បានកើតឡើងក្នុងរយៈពេល២៤ ម៉ោងមុន។

ទីក្រុង Kupiansk និង Lyman នៅក្នុងតំបន់ Kharkiv ភាគឦសានរបស់អ៊ុយក្រែនក៏បានមើលឃើញការកើនឡើងនៃការប្រយុទ្ធថ្មីៗនេះផងដែរ។

រុស្ស៊ីបានចាប់ផ្តើមវាយលុកទ្រង់ទ្រាយធំរបស់ខ្លួនទៅលើប្រទេសជិតខាងកាលពីជិតបួនឆ្នាំមុន ហើយឥឡូវនេះកាន់កាប់ប្រហែលមួយភាគប្រាំនៃដីអ៊ុយក្រែន។ ទណ្ឌកម្មថ្មីរបស់សហរដ្ឋអាមេរិក មានគោលដៅលើវិស័យប្រេងរបស់រុស្ស៊ី ដែលជាឬសគល់នៃសេដ្ឋកិច្ចរុស្ស៊ី គ្រោងនឹងចូលជាធរមាននៅថ្ងៃទី ២១ ខែវិច្ឆិកា។ គោលបំណង គឺដើម្បីបង្ខំប្រធានាធិបតីរុស្ស៊ី Vladimir Putin ឱ្យទទួលយកបទឈប់បាញ់ឈានទៅការបញ្ចប់សង្គ្រាម៕