អាជ្ញាធរមូលដ្ឋានបាននិយាយកាលពីថ្ងៃពុធ (១២ វិច្ឆិកា) ថា គ្រោះថ្នាក់ចរាចរណ៍ដ៏ធំមួយ បានឆក់យកជីវិតមនុស្សយ៉ាងហោចណាស់ ៣៧នាក់ និងរាប់សិបនាក់ផ្សេងទៀតរងរបួស បន្ទាប់ពីរថយន្តក្រុងមួយគ្រឿង បានធ្លាក់ចូលទៅក្នុងជម្រាលជ្រោះដ៏ជ្រៅនៃតំបន់ភ្នំ Arequipa ភាគខាងត្បូងប្រទេសប៉េរូ។

លោក Walther Oporto ប្រធានផ្នែកសុខភាពប្រចាំតំបន់ Arequipa បានដកស្រង់ទិន្នន័យពីក្រុមពន្លត់អគ្គិភ័យនៅកន្លែងកើតហេតុថា អ្នកស្លាប់ទាំងនោះ រួមមានមនុស្ស ៣៦នាក់ស្លាប់នៅនឹងកន្លែង ហើយមនុស្សម្នាក់ទៀតបានស្លាប់នៅក្នុងមន្ទីរពេទ្យ។

ចំនួនអ្នកស្លាប់យ៉ាងខ្ពស់ដល់ទៅជិត ៤០នាក់នេះ គឺស្ថិតក្នុងចំណោមតួលេខខ្ពស់បំផុតមួយនៃគ្រោះថ្នាក់រថយន្តក្រុងជាបន្តបន្ទាប់ នៅប៉ុន្មានឆ្នាំចុងក្រោយនេះក្នុងអាមេរិកឡាទីន និងជាកំណត់ត្រាដ៏អាក្រក់បំផុតមួយសម្រាប់ប្រទេសប៉េរូ។

អាជ្ញាធរបាននិយាយថា រថយន្តក្រុងនេះកំពុងធ្វើដំណើរលើផ្លូវហាយវេពីទីក្រុងឆ្នេរសមុទ្រ Chala ទៅកាន់តំបន់ Arequipa ហើយក៏បានបុកគ្នាជាមួយរថយន្តក្រុងខ្នាតតូចមួយគ្រឿង។ ការប៉ះទង្គិចនេះបានធ្វើឱ្យរថយន្តក្រុងដែលជួបគ្រោះថា្នក់ បានជ្រុលធ្លាក់ចូលទៅក្នុងជ្រោះជម្រៅប្រហែល ២០០ម៉ែត្រ៕