រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយនៅក្នុងបទសម្ភាសន៍មួយ ដែលចេញផ្សាយកាលពីយប់ថ្ងៃពុធ (១២ វិច្ឆិកា) ថា លោកសង្ឃឹមថា ទីក្រុងវ៉ាស៊ីនតោន នឹងមិនចាត់វិធានការណាមួយ ដែលទទួលខុសត្រូវក្នុងការបង្កើនជម្លោះអ៊ុយក្រែន នោះទេ។

លោក Lavrov លើកឡើងថា ប្រធានាធិបតីអាមេរិក លោក Donald Trump បានប្រឹងប្រែងជាយូរណាស់មកហើយក្នុងការសន្ទនាជាមួយរុស្ស៊ី និងបានព្យាយាមស្វែងយល់យ៉ាងពេញលេញអំពីជំហររបស់រុស្ស៊ីចំពោះអ៊ុយក្រែន ហើយក៏បាន "បង្ហាញពីការប្តេជ្ញាចិត្តក្នុងការស្វែងរកដំណោះស្រាយសន្តិភាពប្រកបដោយនិរន្តរភាព"។

ទីភ្នាក់ងារសារព័ត៌មានរដ្ឋរុស្ស៊ី TASS ដកស្រង់សម្តីប្រមុខការទូតរុស្ស៊ីរូបនេះ ដែលនិយាយថា៖ រុស្ស៊ីកំពុងពឹងផ្អែកលើសុភវិនិច្ឆ័យ ដែលថាការរក្សាជំហរ (កិច្ចសន្ទនា) បែបនេះ នឹងបន្តឈ្នះការគាំទ្រនៅទីក្រុងវ៉ាស៊ីនតោន ហើយសង្ឃឹមថា អាមេរិកនឹងបដិសេធសកម្មភាពណាមួយ ដែលអាចធ្វើឱ្យជម្លោះកើនឡើងដល់កម្រិតថ្មីមួយផ្សេងទៀត។

ក្នុងកិច្ចសម្ភាសន៍នោះ លោក Lavrov អះអាងថា លោក Trump បានទទួលស្គាល់រួចហើយថា មូលហេតុមួយនៅពីក្រោយសកម្មភាពរបស់រុស្ស៊ី គឺជាការពង្រីកខ្លួនរបស់សម្ព័ន្ធយោធាណាតូ និងការដាក់ពង្រាយហេដ្ឋារចនាសម្ព័ន្ធនៅជិតព្រំដែនរុស្ស៊ី។ នៅក្នុងការអត្ថាធិប្បាយដែលចេញផ្សាយដោយកាសែត TASS លោក Lavrov បានព្រមានថា អឺរ៉ុបមានចេតនាធ្វើឱ្យខូចដល់កិច្ចប្រឹងប្រែងរបស់សហរដ្ឋអាមេរិក ក្នុងការស្វែងរកដំណោះស្រាយដោយសន្តិវិធី៕