មន្រ្តីនគរបាល ក្រុមមនុស្សធម៌ និងអ្នកជួយសង្គ្រោះរបស់អ៊ុយក្រែន កំពុងប្រញាប់នាំយកជនស៊ីវិលដែលនៅសេសសល់ ជម្លៀសពីជួរមុខភាគអាគ្នេយ៍នៃភ្លើងសង្រ្គាមក្នុងតំបន់ Zaporizhzhia បន្ទាប់ពីស្ថានភាពសន្តិសុខកាន់តែយ៉ាប់យ៉ឺនភ្លាមៗ ដោយសារការវាយរុលរបស់រុស្ស៊ី ប៉ុន្មានថ្ងៃថ្មីៗនេះ។

ឧត្តមសេនីយជាន់ខ្ពស់របស់អ៊ុយក្រែន លោក Oleksandr Syrskyi បាននិយាយកាលពីថ្ងៃអង្គារ (១១ វិច្ឆិកា) សប្ដាហ៍នេះថា ស្ថានភាពសមរភូមិកាន់តែអាក្រក់ទៅៗនៅជិតភូមិ Huliaipole ។ យោធាអ៊ុយក្រែន បាននិយាយថា កងទ័ពរបស់ខ្លួនបានចាកចេញពីភូមិយ៉ាងហោចណាស់ ៦កន្លែង នៅតំបន់ភាគអាគ្នេយ៍នោះ ក្នុងពេលពីរថ្ងៃកន្លងទៅ។

អាជ្ញាធរមូលដ្ឋាននិយាយថា មនុស្សប្រហែល ៥០០នាក់ នៅតែស្ថិតក្នុងភូមិ Huliaipole ពោលគឺធ្លាក់ចុះពីជិត ១៥.០០០នាក់ មុនពេលសង្គ្រាម។ អ៊ុយក្រែនតែងជម្លៀសជនស៊ីវិលពីទីក្រុងជួរមុខនានា ពេញមួយសង្រ្គាមជិត ៤ឆ្នាំមកនេះ ប៉ុន្តែក្រុមសង្គ្រោះនៅតំបន់ Zaporizhzhia បាននិយាយថា ភារកិច្ចជម្លៀសនៅទីនោះមានគ្រោះថ្នាក់ជាពិសេស ដោយសារតែរលកយានដ្រូនក្នុងសមរភូមិ។

ចម្ងាយប្រហែល ១០០គីឡូម៉ែត្រទៅទិសឦសាន កងកម្លាំងរុស្ស៊ីហាក់ដូចជាមានប្រៀបធំបំផុតនៅអ៊ុយក្រែន ចាប់តាំងពីដើមឆ្នាំ២០២៤មក នោះគឺជាការជិតដណ្ដើមយកបានទីក្រុងមជ្ឈមណ្ឌលដឹកជញ្ជូន Pokrovsk ។ ទាហាន និងមេបញ្ជាការអ៊ុយក្រែន និយាយថា ពួកគេមិនមានកម្លាំងទ័ពគ្រប់គ្រាន់ ដើម្បីបន្តជំហរការពាររបស់ខ្លួននោះទេ ខណៈយានដ្រូនរាប់ពាន់គ្រឿងហោះហើរពីលើសមរភូមិ ដែលធ្វើឱ្យការវាយតបតគ្នា រវាងភាគីជម្លោះទាំងសងខាង ត្រូវបង់តម្លៃតបស្នងខ្ពស់បំផុត៕