ប្រទេសអ៊ីរ៉ង់កំពុងតស៊ូជាមួយនឹងវិបត្តិទឹកដ៏ធ្ងន់ធ្ងរបំផុតរបស់ខ្លួនក្នុងរយៈពេលជាច្រើនទសវត្សរ៍ ដោយមន្ត្រីបានព្រមានថា ទីក្រុងតេអេរ៉ង់ ដែលមានប្រជាជនជាង ១០លាននាក់ អាចនឹងក្លាយជាទីក្រុងដែលមិនអាចរស់នៅបានឆាប់ៗនេះ ប្រសិនបើគ្រោះរាំងស្ងួតដែលកំពុងវាយប្រហារប្រទេសនេះនៅតែបន្ត។     

លោកប្រធានាធិបតីអ៊ីរ៉ង់ Masoud Pezeshkian បានព្រមានថា ប្រសិនបើភ្លៀងមិនធ្លាក់នៅខែធ្នូទេ រដ្ឋាភិបាលត្រូវតែចាប់ផ្តើមបែងចែកការកំណត់ទឹកនៅទីក្រុងតេអេរ៉ង់។

លោក Pezeshkian បាននិយាយកាលពីថ្ងៃទី៦ ខែវិច្ឆិកាថា  បើឈានដល់ដំណាក់កាលបែងចែកទឹកហើយ នៅតែមិនមានភ្លៀងទៀត នោះពួកលោកនឹងគ្មានទឹកទាល់តែសោះ។ ប្រជាពលរដ្ឋ ត្រូវតែជម្លៀសចេញពីទីក្រុងតេអេរ៉ង់។  

កាលពីឆ្នាំ២០២១ កង្វះខាតទឹកបានបង្កឱ្យមានការតវ៉ាដោយហិង្សានៅភាគខាងត្បូង ខេត្ត Khuzestan។ ការតវ៉ាមួយចំនួនក៏បានផ្ទុះឡើងផងដែរនៅឆ្នាំ២០១៨ ដោយកសិករ ជាពិសេសបានចោទប្រកាន់រដ្ឋាភិបាលអំពីការគ្រប់គ្រងទឹកមិនបានល្អ។

រដ្ឋាភិបាលរបស់លោក Pezeshkian បានស្ដីបន្ទោសវិបត្តិនេះ លើកាត្តាផ្សេងៗជាច្រើន ដូចជាគោលនយោបាយរបស់រដ្ឋាភិបាលមុនៗ បញ្ហាបម្រែបម្រួលអាកាសធាតុ និងការប្រើប្រាស់ច្រើនហួសកម្រិតជាដើម ៕