ក្រុមមន្ត្រីបាននិយាយកាលពីថ្ងៃពុធ ទី១២ ខែវិច្ឆិកាថា ក្រុមអ្នកស៊ើបអង្កេតបានរកឃើញប្រអប់ខ្មៅពីយន្តហោះយោធារបស់ប្រទេសទួរគី ដែលបានធ្លាក់នៅប្រទេសហ្សកហ្ស៊ី បណ្តាលឲ្យមនុស្ស២០នាក់ស្លាប់ ប៉ុន្តែពុំទាន់មានការវិភាគនៅឡើយ។

ប្រទេសទួរគី បាននិយាយថា យន្តហោះដឹកទំនិញយោធាបានធ្លាក់ខណៈត្រឡប់ទៅប្រទេសវិញពីប្រទេសអាស៊ែរបៃហ្សង់ ហើយរហូតមកដល់ពេលនេះ ក្រុមអ្នកស៊ើបអង្កេតបានរកឃើញសាកសពចំនួន ១៩នាក់ ហើយកំពុងស្វែងរកសាកសពចុងក្រោយម្នាក់ទៀត។

ក្រសួងបាននិយាយបន្ទាប់ពីឧបទ្ទវហេតុនេះថា យន្តហោះបានហោះចេញពីអាកាសយានដ្ឋាន Ganja នៅភាគខាងលិចប្រទេសអាស៊ែរបៃហ្សង់កាលពីរសៀលថ្ងៃអង្គារ ប៉ុន្តែបានធ្លាក់ភ្លាមៗបន្ទាប់ពីបានឆ្លងកាត់ព្រំដែនចូលទៅក្នុងភាគខាងកើតប្រទេសហ្សកហ្ស៊ី។

រដ្ឋមន្ត្រីការពារជាតិ លោក Yasar Guler បាននិយាយនៅលើបណ្តាញ X រួមជាមួយនឹងរូបថតចំនួន ២០ សន្លឹករបស់អ្នកដែលបានស្លាប់ថា «សមមិត្តវីរៈបុរសរបស់យើងបានស្លាប់នៅថ្ងៃទី១១ ខែវិច្ឆិកា ឆ្នាំ ២០២៥ ដោយសារតែការធ្លាក់យន្តហោះដឹកទំនិញយោធា C-130 របស់យើង ដែលបានហោះចេញពី ប្រទេសអស៊ែរបៃហ្សង់ដើម្បីត្រឡប់ទៅប្រទេសទួរគីវិញ»។

ប្រធានាធិបតី លោក Recep Tayyip Erdogan បាននិយាយថា ក្រុមអ្នកស៊ើបអង្កេតបានរកឃើញប្រអប់ខ្មៅរបស់យន្តហោះ ហើយកំពុងពិនិត្យមើលថាតើអ្វីបណ្តាលឱ្យយន្តហោះធ្លាក់។ លោកបាននិយាយថា «ក្រុមស៊ើបអង្កេតឧបទ្ទវហេតុចំនួន៤៦នាក់របស់យើងត្រូវបានដាក់ពង្រាយទៅកាន់តំបន់នោះ។ ប្រអប់ខ្មៅយន្តហោះត្រូវបានរកឃើញ ហើយការស៊ើបអង្កេតបានចាប់ផ្តើម»។