ប្រធានទីភ្នាក់ងារអន្តោប្រវេសន៍របស់អង្គការសហប្រជាជាតិ បានអំពាវនាវឱ្យមានបទឈប់បាញ់ និងច្រករបៀងមនុស្សធម៌ ដើម្បីជួយដល់ជនស៊ីវិលរាប់ម៉ឺននាក់ដែលជាប់ខ្លួននៅក្នុងទីក្រុង el-Fasher ជាទីក្រុងនៅក្នុងតំបន់ Darfur ប្រទេសស៊ូដង់ ដែលបានធ្លាក់ចូលទៅក្នុងដៃរបស់កងកម្លាំងគាំទ្ររហ័សយោធាប៉ារ៉ា (RSF) កាលពីខែមុន។

លោក Amy Pope អគ្គនាយកនៃអង្គការទេសន្តប្រវេសន៍អន្តរជាតិ(IOM) បានប្រាប់សារព័ត៌មាន Al Jazeera កាលពីថ្ងៃពុធថា «ការព្រួយបារម្ភចម្បងគឺការទទួលបានដំណើរការ» សម្រាប់ពលរដ្ឋដែលត្រូវបានកាត់ផ្តាច់ពីជំនួយមនុស្សធម៌ និងសេវានានានៅក្នុងទីក្រុង el-Fasher ។

លោក Pope និយាយថា «នៅពេលដែលតួអង្គមនុស្សធម៌ ប្រឈមមុខនឹងហានិភ័យ នៅពេលនោះពួកគេនឹងត្រូវស្លាប់ នៅពេលដែលពួកគេត្រូវបានគេបាញ់ នៅពេលដែលពួកគេត្រូវបានគេឃុំខ្លួន ហើយយើងមិនអាចទៅដល់ប្រជាជនដើម្បីផ្តល់នូវអ្វីដែលពួកគេត្រូវការដើម្បីរស់នោះទេ»។

«បញ្ហាចម្បងគឺការធានាបានថាមានបទឈប់បាញ់ មានច្រករបៀងមនុស្សធម៌ ដូច្នេះក្រុមផ្តល់ជំនួយអាចនាំយកជំនួយនោះទៅឱ្យជនស៊ីវិលដែលជាប់ខ្លួន»។

ក្រុមសិទ្ធិមនុស្ស បានចោទប្រកាន់កងកម្លាំងគាំទ្ររហស័(RSF) ដែលកំពុងប្រយុទ្ធជាមួយកងកម្លាំងប្រដាប់អាវុធស៊ូដង់ (SAF) ដើម្បីគ្រប់គ្រងប្រទេសស៊ូដង់ចាប់តាំងពីខែមេសាឆ្នាំ២០២៣ ថា បានប្រព្រឹត្តការសម្លាប់រង្គាលទ្រង់ទ្រាយធំក្នុងពេលដណ្តើមបានទីក្រុង el-Fasher កាលពីថ្ងៃទី២៦ ខែតុលា។