ក្រុមមន្ត្រីសង្គ្រោះបន្ទាន់បាននិយាយថា រថយន្តធុនស្រាលមួយគ្រឿង បានជិះបំបុកចូលទៅក្នុងផ្សារមួយកន្លែងនៅកូរ៉េខាងត្បូង នាថ្ងៃព្រហស្បតិ៍ (១៣ វិច្ឆិកា) នេះ ហើយបានបង្កើនល្បឿនដល់ទៅ ១៥០ម៉ែត្រ ដែលបណ្តាលឱ្យមនុស្ស ២នាក់បានស្លាប់ និង ១៨នាក់រងរបួស។

មន្ត្រីអគ្គិភ័យបាននិយាយសង្ខេបថា៖ ឧបទ្ទវហេតុនេះកើតឡើងនៅវេលាម៉ោងក្នុងស្រុកប្រហែល ១១ព្រឹក នៅផ្សារលក់ទំនិញតាមចិញ្ចើមផ្លូវឈ្មោះ Jeil មានទីតាំងនៅទីក្រុង Bucheon ចម្ងាយប្រហែល ២០គីឡូម៉ែត្រ ភាគខាងលិចនៃរដ្ឋធានីសេអ៊ូល ចំណែកអ្នកបើកបរត្រូវឃាត់ខ្លួននៅកន្លែងកើតហេតុ។

មន្ត្រីរូបនេះបន្តថា រថយន្តដឹកទំនិញបានបើកថយក្រោយ ២៨ម៉ែត្រ មុនពេលបន្ថែមល្បឿនសំដៅចូលទៅផ្សារក្នុងស្រុកមួយនោះ ហើយអ្នកបើកបរមានវ័យប្រហែល ៦០ឆ្នាំ បាននិយាយថា ដោយសារល្បឿនរថយន្តស្ទុះទៅមុខភ្លាមៗពេក ទើបកើតឧបទ្ទវហេតុ។

មន្ត្រីនគរបាលម្នាក់បាននិយាយក្នុងសន្និសីទសារព័ត៌មានថា អ្នកបើកបររូបនេះមិនមានជាតិស្រវឹងក្នុងខ្លួនទេ នៅពេលធ្វើតេស្តរកជាតិអាល់កុល។ មន្ត្រីដដែលបន្តទៀតថា សមត្ថកិច្ចនឹងប្រគល់រថយន្តទៅឱ្យក្រុមស៊ើបអង្កេតដើម្បីស្វែងរកមូលហេតុនៃគ្រោះថ្នាក់៕