តម្លៃភាគហ៊ុនក្នុងពិភពលោក និងមាស បានដកដង្ហើមយ៉ាងធូរស្រាល នៅថ្ងៃព្រហស្បតិ៍ (១៣ វិច្ឆិកា) នេះ ក្រោមទីបញ្ចប់នៃការបិទរដ្ឋាភិបាលរយៈពេលវែងបំផុតក្នុងប្រវត្តិសាស្រ្តសហរដ្ឋអាមេរិក ដោយទីផ្សារសកលបានងាកទៅរង់ចាំមើលការបន្តឡើងវិញនៃទិន្នន័យសេដ្ឋកិច្ចរបស់ទីក្រុងវ៉ាស៊ីនតោន ដើម្បីវាស់ស្ទង់ចក្ខុវិស័យអត្រាការប្រាក់ធនាគារកណ្ដាលអាមេរិក។

ភាគហ៊ុនរបស់សហរដ្ឋអាមេរិក ទទួលបានកំណើន ០,២% តាមរយៈវគ្គជួញដូរនៅអាស៊ី ហើយសន្ទស្សន៍ FTSE របស់ចក្រភពអង់គ្លេស បានមើលឃើញកំណើនតិចតួច ចំណែកភាគហ៊ុននៅអ៊ឺរ៉ុប ក៏បង្ហាញពីកម្រិតខ្ពស់បន្ថែមទៀត។

នៅខាងអាស៊ីវិញ ភាគហ៊ុន Nikkei របស់ជប៉ុន បានកើនឡើង ០,៣% ចំណែកសន្ទស្សន៍ Topix ដ៏ទូលំទូលាយ បានកើនឡើងដល់កម្រិតខ្ពស់បំផុតមិនធ្លាប់មាន ខណៈវិនិយោគិនបានផ្លាស់ប្តូរផលប័ត្រពីក្រុមហ៊ុនបញ្ញាសិប្បនិមិត្ត AI ហើយងាកទៅទិញផ្នែកផ្សេងទៀតនៃសេដ្ឋកិច្ច។

ជាមួយគ្នានេះ មាសបានបន្តតម្លៃកំណត់ត្រានាពេលថ្មីៗរបស់ខ្លួននៃការជួញដូរលើសពី ៤.២០០ដុល្លារ ក្នុងមួយអោន ខណៈមូលបត្របំណុលក៏មានស្ថិរភាព ជាមួយនឹងទិន្នផល ១០ឆ្នាំរបស់សហរដ្ឋអាមេរិក ស្ថិតនៅអត្រា ៤,០៩%។ ប្រតិកម្មដ៏ល្អពីទីផ្សារនេះ បានកើតឡើងបន្ទាប់ពីលោកប្រធានាធិបតីអាមេរិក Donald Trump បានចុះហត្ថលេខាលើសេចក្ដីស្នើច្បាប់មួយ ដើម្បីផ្ដល់ទីបញ្ចប់ឱ្យការបិទរដ្ឋាភិបាលអស់ជាង ៤០ថ្ងៃមកនេះ៕