អង្គការសហប្រជាជាតិ បាននិយាយកាលពីថ្ងៃពុធថា បឹង ទន្លេ និងឆ្នេរសមុទ្រអ៊ុយក្រែនប្រហែល ១៣.៥០០ គីឡូម៉ែត្រការ៉េ (៥.000ម៉ាយការ៉េ) អាចនឹងត្រូវរងការប៉ះពាល់ដោយគ្រាប់មីន និងគ្រឿងផ្ទុះ បន្ទាប់ពីការឈ្លានពានរបស់រុស្ស៊ីជិត ៤ឆ្នាំ។

ទោះបីជាសង្គ្រាមភាគច្រើន ត្រូវបានប្រយុទ្ធនៅលើដីក៏ដោយ ភាគីទាំងពីរ បានដាក់មីននៅតំបន់ធំៗ នៅជិតឆ្នេរសមុទ្រ ហើយគ្រាប់ផ្លោងមួយចំនួនដែលមិនទាន់ផ្ទុះពីការបាញ់ផ្លោងតាមអាកាសប្រចាំថ្ងៃរបស់      រុស្ស៊ី បានធ្លាក់ចូលទៅក្នុងទឹក។

កម្មវិធីអភិវឌ្ឍន៍អង្គការសហប្រជាជាតិ (UNDP) ប្រចាំអ៊ុយក្រែន បាននិយាយនៅក្នុងសេចក្តីថ្លែងការណ៍មួយថា៖«តំបន់ទឹកអ៊ុយក្រែនប្រមាណ ១៣.៥០០ គីឡូម៉ែត្រការ៉េ ក្នុងនោះមានទាំងទន្លេ Dnipro បឹង និងឆ្នេរសមុទ្រសមុទ្រខ្មៅ អាចនឹងត្រូវគ្របដណ្តប់ដោយសំណល់គ្រឿងផ្ទុះពីសង្គ្រាម»។

មានតែ១,៤ ភាគរយនៃដែនទឹកដែលមិនអាចប្រើប្រាស់បាន ស្មើនឹងទំហំរបស់តំបន់ Puerto Rico ត្រូវបានដោះមីនរួច ជាមួយគ្រឿងផ្ទុះប្រហែល ២.៨០០គ្រាប់ ត្រូវបានយកចេញ។

អ៊ុយក្រែនប្រើប្រាស់មនុស្សយន្តក្រោមទឹក ក្នុងកិច្ចខិតខំប្រឹងប្រែងដោះមីនរបស់ខ្លួន ហើយអង្គការសហប្រជាជាតិ បាននិយាយថា ខ្លួនបានបណ្តុះបណ្តាលគ្រូបង្វឹកជំនាញចំនួន ១៥ នាក់ ជាផ្នែកមួយនៃកិច្ចខិតខំប្រឹងប្រែងគាំទ្ររបស់ខ្លួន៕