អ្នកនាំពាក្យវិមានក្រឹមឡាំង លោក Dmitry Peskov បានថ្លែងថា រុស្ស៊ីមិនចង់ធ្វើសេចក្តីថ្លែងការណ៍ ក្នុង  បរិបទនៃវោហាសាស្ត្រជុំវិញការធ្វើតេស្តនុយក្លេអ៊ែរទេ ព្រោះវាតែងតែមានគ្រោះថ្នាក់។ 

លោកបានប្រាប់ទូរទស្សន៍ CNNថា៖«វោហាសាស្ត្រនុយក្លេអ៊ែរតែងតែមានគ្រោះថ្នាក់។ ម៉្យាងវិញទៀត អាវុធនុយក្លេអ៊ែរ គឺជារឿងល្អណាស់សម្រាប់ការរក្សាសន្តិភាពទាក់ទងនឹងការការពារគ្នាទៅវិញទៅមក ប៉ុន្តែម៉្យាងវិញទៀត វាក៏មានគ្រោះថ្នាក់ក្នុងការនិយាយអំពីរឿងនេះដែរ។ ហើយនិយាយតាមត្រង់ទៅ យើងមិនចង់ធ្វើសេចក្តីថ្លែងការណ៍ណាមួយទេ»។  

នាពេលថ្មីៗនេះ ប្រធានាធិបតីអាមេរិក លោក ដូណាល់ ត្រាំ (Donald Trump) បាននិយាយថា លោកបានណែនាំឲ្យមន្ទីរបញ្ចកោណ បន្តការធ្វើតេស្តអាវុធនុយក្លេអ៊ែរជាបន្ទាន់ ដោយលើកឡើងពីការពិតដែលថា ប្រទេសដទៃទៀត កំពុងធ្វើដូច្នេះរួចហើយ។ លោក ត្រាំ មិនបានបញ្ជាក់ថាតើការធ្វើតេស្តប្រភេទណាដែលលោកកំពុងសំដៅនោះទេ ឬថាតើវារួមបញ្ចូលទាំងការបំផ្ទុះក្បាលគ្រាប់នុយក្លេអ៊ែរដែរឬទេ។

នៅក្នុងកិច្ចប្រជុំជាមួយក្រុមប្រឹក្សាសន្តិសុខរុស្ស៊ី កាលពីថ្ងៃទី៥ ខែវិច្ឆិកា លោកប្រធានាធិបតី វ្ល៉ាឌីមៀ ពូទីន (Vladimir Putin) បានណែនាំឲ្យក្រសួងការបរទេស ក្រសួងការពារជាតិ សេវាពិសេស និងទីភ្នាក់ងារស៊ីវិល ប្រមូលនិងវិភាគព័ត៌មានបន្ថែម និង «ដាក់សំណើសម្របសម្រួលលើការចាប់ផ្តើមនៃការរៀបចំសម្រាប់ការសាកល្បងអាវុធនុយក្លេអ៊ែរ»៕