រដ្ឋាភិបាលចក្រភពអង់គ្លេស បាននិងកំពុងពិនិត្យមើលមធ្យោបាយនានាដើម្បីធ្វើឲ្យប៉ះទង្គិចដល់ប្រភពមូលនិធិរបស់ប្រទេសរុស្ស៊ី ក្នុងពេលមានការឈ្លានពាននៅតែបន្តលើអ៊ុយក្រែន។ រដ្ឋាភិបាលបានប្រកាសបម្រាមលើសេវានានាទាក់ទងនឹងការដឹកជញ្ជូនឧស្ម័នធម្មជាតិរាវរបស់រុស្ស៊ីទៅកាន់ប្រទេសទីបី។

វិធានការនេះ ធ្វើឡើងក្នុងអំឡុងកិច្ចប្រជុំរបស់ក្រុមរដ្ឋមន្ត្រីការបរទេសប្រទេសមានសេដ្ឋកិច្ចរីកលូតលាស់ទាំង៧ (G7) នៅក្នុងប្រទេសកាណាដា។ ចក្រភពអង់គ្លេសនឹងហាមឃាត់សេវាជាច្រើន ដូចជាការធានារ៉ាប់រងនិងការដឹកជញ្ជូនឧស្ម័នធម្មជាតិរាវ(LNG)របស់រុស្ស៊ីដោយនាវារបស់អង់គ្លេស។ 

ក្រុមមន្ត្រីមានផែនការដាក់ចេញវិធានការថ្មីៗជាដំណាក់កាលជាមួយដៃគូអឺរ៉ុបផ្សេងទៀតនៅឆ្នាំក្រោយ។ ចក្រភពអង់គ្លេសបានហាមឃាត់ការនាំចូលឧស្ម័នធម្មជាតិរាវរួចហើយកាលពីឆ្នាំ២០២៣។ 

កាលពីខែមុន សហភាពអឺរ៉ុប បានដាក់ទណ្ឌកម្មបន្ថែមទៅលើរុស្ស៊ី រួមទាំងការហាមឃាត់ការនាំចូលឧស្ម័នធម្មជាតិរាវនៅចុងឆ្នាំក្រោយ។ រុស្ស៊ី ត្រូវបានគេជឿថាមានបំណងគេចវ៉េសពីសម្ពាធបន្ថែមទៀត។

 រដ្ឋមន្ត្រីការបរទេសលោក Sergey Lavrov បាននិយាយថា ក្រុមមន្ត្រីបានត្រៀមជាស្រេចដើម្បីបន្តការរៀបចំសម្រាប់ជំនួបកំពូលរុស្ស៊ី-អាមេរិក។