​មី​យ៉ាន់​ម៉ា​៖ មេដឹកនាំ​ស្តីទី​នៃ​រដ្ឋាភិបាល​ស៊ីវិល​ស្រមោល​ របស់​សហភាព​មី​យ៉ាន់​ម៉ា​បាន​និ​យា​យ​ថា ​ខ្លួន​នឹង​ព្យាយាម​ផ្តល់​សិទ្ធិ​ស្របច្បាប់ ​ដល់​ប្រជាជន​ដើម្បី​ការពារ​ខ្លួន​ ខណៈ​ចំនួន​អ្នក​ស្លាប់​នៅ​ក្នុង​ការ​តវ៉ា​ប្រឆាំង​នឹង​រដ្ឋប្រហារ​ កាលពី​ខែ​មុន​បាន​កើន​ឡើង​ជាង ៨០​នាក់​ នេះ​បើ​យោង​តាម​ក្រុម​តស៊ូ​មតិ​។​

​មេដឹកនាំ​ស្តីទី​នៃ​រដ្ឋាភិបាល​ស៊ីវិល​ស្រមោល​ របស់​សហភាព​មី​យ៉ាន់​ម៉ា​រូបនេះ​បាន​និយាយ​ថា​ ប្រជា​ជន​ត្រូវតែ​ឈ្នះ​ការបះបោរ​ប្រឆាំង​នឹង​របប​យោធា ​ខណៈ​ដែល​កម្លាំង​សន្តិសុខ​បាន​បើក​ការ​បាញ់​ប្រហារ ​ទៅលើ​ក្រុម​បាតុករ​នៅ​ទីក្រុង​យ៉ាង​ហ្គោ​ន ​ហើយ​មនុស្ស​យ៉ាង​ហោច​ណាស់ ៥​នាក់​ត្រូវ​បាន​សម្លាប់ ​ខណៈ​ការ​តវ៉ា​បាន​បន្ត​មកដល់​សប្តាហ៍​ទី​៦​។ ​លោក Mahn Win Khaing Than ​ដែល​កំពុង​ដឹក​នាំ​រួម​ជាមួយ​មន្ត្រី​ជាន់ខ្ពស់​ភា​គ​ច្រើន​ មកពី​គណបក្ស​សម្ព័ន្ធ​ដើម្បី​ប្រជាធិបតេយ្យ​បាន​ថ្លែង​ថា​ ​នេះ​គឺជា​ពេលវេលា​ដ៏​ខ្មៅ​ងងឹត​បំផុត​របស់​ប្រទេស ​និង​ជា​ពេលវេលា​ដែល​ព្រះអាទិត្យ​រះ​ជិត​មកដល់​ហើយ​។​

​លោក​បាន​និយាយ​ទៅកាន់​សាធារណជន​ តាម​បណ្ដាញ​សង្គម Facebook​ កាលពី​ថ្ងៃ​សៅរ៍​ថា នេះ​ក៏​ជា​ការ​សាកល្បង​របស់​ប្រជាជន​យើង​ផង​ដែរ ​ដើម្បី​ដឹង​ថា​ តើ​យើង​អាច​ទប់​ទល់នឹង​ពេល​វេលា​ដ៏​ខ្មៅ​ងងឹត​បំផុត​នេះ​បាន​យូរ​ប៉ុណ្ណា។​ លោក Khaing Than កាន់​តំណែង​ជា​ប្រធាន​សភា ក្នុង​អំឡុង​រដ្ឋបាល​មុន​របស់​លោក​ស្រី ​Aung San Suu Kyi​។ លោក​បាន​និយាយ​ថា ​រដ្ឋាភិបាល​ស៊ីវិល​មានបំណង​បង្កើត​ច្បាប់​ចាំបាច់​ ដើម្បីឲ្យ​ប្រជាជន​មាន​សិទ្ធិ​ការពារ​ខ្លួន ប្រឆាំង​​នឹង​ការ​បង្ក្រាប​របស់​យោធា​៕

អត្ថបទ៖ សុខមាន