គណៈកម្មាធិការសភាតំណាងរាស្ត្រសហរដ្ឋអាមេរិក កាលពីថ្ងៃពុធ (ទី១២ ខែវិច្ឆិកា) បានឲ្យដឹងថា ប្រទេសចិនអស់រយៈពេលជាច្រើនទសវត្សរ៍មកហើយ បានព្យាយាមកំណត់តម្លៃរ៉ែសំខាន់ៗជាសកល ដោយប្រើការគ្រប់គ្រងរបស់ខ្លួនជាអាវុធសេដ្ឋកិច្ច ដើម្បីពង្រីកវិស័យផលិតកម្ម និងឥទ្ធិពលភូមិសាស្ត្រនយោបាយរបស់ខ្លួន។

ការចោទប្រកាន់ដែលមាននៅក្នុងរបាយការណ៍ចំនួន ៥០ទំព័រ ពីគណៈកម្មាធិការជ្រើសរើសសភាអាមេរិកនៃគណបក្សទាំង២ ស្តីពីប្រទេសចិន និងដែលត្រូវបានពិនិត្យដោយសារព័ត៌មាន Reuters បន្ថែមទៅលើសារជាបន្តបន្ទាប់ពីទីក្រុងវ៉ាស៊ីនតោនដែលរិះគន់ការផ្លាស់ប្តូររបស់ទីក្រុងប៉េកាំងនៅក្នុងទីផ្សាររ៉ែសំខាន់ៗ។

ទាំងលោកប្រធានាធិបតី Donald Trump និងអ្នកកាន់តំណែងមុនរបស់លោក គឺលោក Joe Biden ក្នុងរយៈពេលប៉ុន្មានឆ្នាំចុងក្រោយនេះ បានព្យាយាមរារាំងការត្រួតត្រារបស់ប្រទេសចិន ក្នុងវិស័យរ៉ែសំខាន់ៗ។

របាយការណ៍នីតិប្បញ្ញត្តិរបស់គណៈកម្មាធិការនេះ មានគោលបំណងចង់រៀបចំក្រឹត្យប្រធានាធិបតីឲ្យទៅជាច្បាប់ជាធរមាន ដោយមានអនុសាសន៍ផ្សេងៗ ក្នុងនោះរួមមានទាំងការគ្រប់គ្រងតម្លៃ និងការពង្រីកការត្រួតពិនិត្យរបស់រដ្ឋាភិបាលលើទីភ្នាក់ងាររាយការណ៍តម្លៃ។

ស្ថានទូតចិនប្រចាំទីក្រុងវ៉ាស៊ីនតោន មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ទាក់ទងនឹងរបាយការណ៍នេះ។ នៅមុននេះ ប្រទេសចិនបានចោទប្រកាន់សហរដ្ឋអាមេរិកថា បានផ្ដល់ព័ត៌មានមិនត្រឹមត្រូវ ជុំវិញការគ្រប់គ្រងការនាំចេញរ៉ែកម្ររបស់ទីក្រុងប៉េកាំង និងបង្កឲ្យមានការភ័យស្លន់ស្លោ ចំពោះបញ្ហានេះ៕