រដ្ឋមន្ត្រីការបរទេសអាមេរិកលោក Marco Rubio កាលពីថ្ងៃពុធ (ទី១២ ខែវិច្ឆិកា) បានរិះគន់កងកម្លាំងគាំទ្ររហ័សរបស់ស៊ូដង់ (RSF) ដោយអំពាវនាវឲ្យមានការកាត់ផ្តាច់ការផ្គត់ផ្គង់អាវុធដល់ក្រុមនេះភ្លាមៗ។

លោក Rubio បាននិយាយថា៖ «បញ្ហាសំខាន់ដែលយើងកំពុងជួប គឺថា RSF យល់ព្រមចំពោះអ្វីៗទាំងអស់ ហើយបន្ទាប់មកមិនដែលអនុវត្តតាមឡើយ»។ លោកបានបន្ថែមថា៖ «ត្រូវធ្វើអ្វីមួយ ដើម្បីកាត់ផ្តាច់អាវុធ និងការគាំទ្រដែលក្រុម RSF កំពុងទទួលបាន»។

អំឡុងពេលថ្លែងទៅកាន់អ្នកសារព័ត៌មាននៅខាងក្រៅកិច្ចប្រជុំរបស់ក្រុមប្រទេសទាំង៧ (G7) នៅប្រទេសកាណាដា លោកបានចោទប្រកាន់ក្រុម RSF ថា បានប្រកាសកិច្ចព្រមព្រៀង ស្តីពីបទឈប់បាញ់មនុស្សធម៌ «ប៉ុន្តែពួកគេមិនមានបំណងអនុវត្តតាមឡើយ»។

លោក Rubio បានបន្តថា រដ្ឋបាលរបស់លោក Donald Trump នឹងបើកចំហ ក្នុងការកំណត់ RSF ជាអង្គការភេរវកម្មបរទេស ប្រសិនបើវានឹងជួយនាំឲ្យសង្រ្គាមឈានដល់ទីបញ្ចប់។

ជាមួយគ្នានេះ ដោយមិនបញ្ចេញឈ្មោះប្រទេសជាក់លាក់ណាមួយ លោក Rubio បានបញ្ជាក់ថា សហរដ្ឋអាមេរិកនឹងមិនអនុញ្ញាតឲ្យក្រុមដែលហៅថា Quad ដែលនាំសហរដ្ឋអាមេរិក អារ៉ាប៊ីសាអ៊ូឌីត អេហ្ស៊ីប និងអារ៉ាប់រួម នៅជាមួយគ្នា ក្លាយជាខែលដែលមនុស្សលាក់ខ្លួនឡើយ ហើយនិយាយថា «យើងមានពាក់ព័ន្ធជាមួយ Quad យើងកំពុងព្យាយាមដោះស្រាយវា»។

អារ៉ាប់រួមត្រូវបានចោទប្រកាន់ថា បានបន្តបញ្ជូនអាវុធ និងប្រាក់ចូលទៅក្នុងក្រុម RSF។ ពួកគេបានបដិសេធការចោទប្រកាន់ទាំងនេះ៕