ប្រធានគោលនយោបាយការបរទេសរបស់សហភាពអឺរ៉ុប (EU) លោកស្រី Kaja Kallas បានប្រាប់សារព័ត៌មាន Reuters កាលពីថ្ងៃពុធ (ទី១២ ខែវិច្ឆិកា) ថា រឿងអាស្រូវពុករលួយថាមពល នៅក្នុងប្រទេសអ៊ុយក្រែន «គឺជារឿងគួរឲ្យសោកស្ដាយណាស់» ហើយវាជារឿងសំខាន់ដែលទីក្រុងគីវយកចិត្តទុកដាក់យ៉ាងខ្លាំង។

គួរដឹងថា ប្រធានាធិបតីអ៊ុយក្រែន លោក Volodymyr Zelenskiy បានអំពាវនាវឲ្យបណ្តេញរដ្ឋមន្ត្រីគណៈរដ្ឋមន្ត្រី ២រូប កាលពីថ្ងៃពុធ ចំពេលមានការស៊ើបអង្កេតលើគម្រោងអំពើពុករលួយដែលមានតម្លៃ ១០០លានដុល្លារ ដែលបានបញ្ឆេះកំហឹងសាធារណៈជាថ្មី ចំពោះរដ្ឋាភិបាលរបស់ប្រទេសនេះ។

នៅក្រៅកិច្ចប្រជុំនៃក្រុមរដ្ឋមន្ត្រីការបរទេសរបស់ក្រុមប្រទេសទាំង៧ (G7) នៅប្រទេសកាណាដា លោកស្រី Kallas បាននិយាយថា៖ «ពួកគេកំពុងចាត់វិធានការយ៉ាងខ្លាំងក្លា។ មិនមានកន្លែងសម្រាប់ប្រព្រឹត្តិអំពើពុករលួយនោះទេ ជាពិសេស នាពេលនេះ។ ខ្ញុំចង់មានន័យថា វាជាប្រាក់របស់ប្រជាជនដែលគួរតែបានទៅដល់សមរភូមិជួរមុខ»។

លោកស្រីបានបន្ថែមថា៖ «ខ្ញុំគិតថា អ្វីដែលសំខាន់ខ្លាំងណាស់នោះ គឺថា ពួកគេពិតជាបានចាត់វិធានការយ៉ាងលឿនរហ័ស ហើយយកចិត្តទុកដាក់លើបញ្ហានេះយ៉ាងខ្លាំង»៕