រដ្ឋមន្ត្រីការបរទេសទួរគី លោក Hakan Fidan បាននិយាយកាលពីថ្ងៃពុធថា ក្រុមហាម៉ាស បានបង្ហាញ  ឆន្ទៈក្នុងការចាត់វិធានការលក្ខណៈស្ថាបនាឆ្ពោះទៅរកបទឈប់បាញ់យូរអង្វែង នៅក្នុងតំបន់ហ្កាហ្សា ដោយជំរុញឲ្យអ៊ីស្រាអែលអនុម័តវិធីសាស្រ្តដូចគ្នា ដើម្បីធ្វើឲ្យសន្តិភាពអាចកើតឡើង។

លោក Fidan បាននិយាយនៅក្នុងសន្និសីទសារព័ត៌មានរួមគ្នាមួយនៅក្នុងរដ្ឋធានីទួរគី ជាមួយរដ្ឋមន្ត្រីការបរទេសអេហ្ស៊ីបលោក Badr Abdelatty ដែលកំពុងធ្វើទស្សនកិច្ចថា៖«ក្រុមហាម៉ាស កំពុងបង្ហាញពីឆន្ទៈរបស់ខ្លួន ក្នុងការចាត់វិធានការក្នុងន័យស្ថាបនា ដើម្បីធានាថា ការឈប់បាញ់នេះ មានលក្ខណៈអចិន្ត្រៃយ៍។ អ៊ីស្រាអែល គួរតែមានការព្រមព្រៀងដូចគ្នា»។

លោក Fidan បានបញ្ជាក់ថា តំបន់ហ្កាហ្សា គឺជាផ្នែកមួយដែលមិនអាចបំបែកចេញពីប៉ាឡេស្ទីនបាន ហើយត្រូវតែត្រូវបានចាត់ទុកបែបនេះ ដោយសហគមន៍អន្តរជាតិ។

លោកក៏បានប្រកាសផងដែរថា នាវាជំនួយមនុស្សធម៌របស់ទួរគីមួយគ្រឿង បានចាកចេញពីកំពង់ផែ Mersin ទៅកាន់កំពង់ផែ El Arish របស់អេហ្ស៊ីប ដើម្បីដឹកជញ្ជូនសម្ភារៈទៅកាន់តំបន់ហ្កាហ្សា ហើយបានបញ្ជាក់ថា ទួរគីនឹងចូលរួមក្នុងសន្និសីទហ្កាហ្សានាពេលខាងមុខ ដែលរៀបចំដោយអេហ្ស៊ីប៕