នៅថ្ងៃព្រហស្បតិ៍នេះ ក្រសួងការបរទេសចិន បានទាមទារឲ្យនាយករដ្ឋមន្រ្តីជប៉ុនលោកស្រី Sanae Takaichi កែសម្រួលឡើងវិញនូវអ្វីដែលខ្លួនចាត់ទុកថាជាសេចក្តីអត្ថាធិប្បាយពាក់ព័ន្ធនឹងកោះតៃវ៉ាន់ដ៏គួរឲ្យស្អប់ខ្ពើម ហើយពួកគេបានព្រមានថា ជប៉ុននឹងមានផលវិបាក ។

លោកស្រី Takaichi បង្កឲ្យមានជម្លោះផ្នែកការទូតជាមួយទីក្រុងប៉េកាំង ក្រោយសេចក្តីអត្ថាធិប្បាយរបស់លោកស្រីនៅក្នុងសភាកាលពីសប្តាហ៍មុនថា ការវាយប្រហាររបស់ចិនលើកោះតៃវ៉ាន់ អាចនឹងធ្វើឲ្យមានស្ថានភាពគំរាមកំហែងដល់ការរស់រាន និងបង្កឲ្យមានការឆ្លើយតបយោធាដែលអាចកើតមានពីទីក្រុងតូក្យូ ។

អ្នកនាំពាក្យក្រសួងការបរទេសចិនលោក Lin Jian និយាយក្នុងសន្និសីទសារព័ត៌មាននៅទីក្រុងប៉េកាំងថា លោកស្រី Takaichi បដិសេធន៍ចោលនូវការកែប្រែសេចក្តីអត្ថាធិប្បាយរបស់លោកស្រី ក្រោយការដាក់កំណត់ទូតតវ៉ាយ៉ាងម៉ឺងម៉ាត់ ដោយជំរុញឲ្យទីក្រុងតូក្យូកែសម្រួលសកម្មភាពរបស់ខ្លួនជាបន្ទាន់ ។

សូមបញ្ជាក់ថា ទីក្រុងប៉េកាំងបានចាត់ទុកកោះតៃវ៉ាន់ដែលគ្រប់គ្រងតាមបែបលទ្ធិប្រជាធិបតេយ្យថាជាកោះផ្តាច់ខ្លួនរបស់ខ្លួន ហើយពួកគេពុំច្រានចោលនោះឡើយ ក្នុងការប្រើប្រាស់កម្លាំង ដើម្បីគ្រប់គ្រងកោះមួយនេះ ។ អាជ្ញាធរកោះតៃវ៉ាន់ បដិសេធន៍ចោលអំណះអំណាងរបស់ទីក្រុងប៉េកាំង ហើយពួកគេនិយាយថា មានតែពលរដ្ឋរបស់ខ្លួនប៉ុណ្ណោះ ដែលអាចសម្រេចចិត្តលើអនាគតកោះមួយនេះបាន ៕