វិមានក្រឹមឡាំង នៅថ្ងៃព្រហស្បតិ៍ (ទី១៣ ខែវិច្ឆិកា) នេះ បានលើកឡើងថា អ៊ុយក្រែននឹងត្រូវតែចរចាជាមួយប្រទេសរុស្ស៊ី «ទោះយូរ ឬឆាប់» ហើយបានព្យាករថា ជំហរចរចារបស់ទីក្រុងគីវ នឹងកាន់តែអាក្រក់ទៅៗ ពីមួយថ្ងៃទៅមួយថ្ងៃ។

ទីក្រុងមូស្គូដែលកងកម្លាំងរបស់ខ្លួនកំពុងព្យាយាមដណ្តើមកាន់កាប់ទីក្រុង Pokrovsk នៅភាគខាងកើតនៃប្រទេសអ៊ុយក្រែន បានចោទប្រកាន់មន្ត្រីអ៊ុយក្រែនថា បានបដិសេធមិនចូលរួមក្នុងកិច្ចចរចាសន្តិភាព។ ទីក្រុងគីវប្រាប់ថា លក្ខខណ្ឌរបស់ក្រុងមូស្គូ ក្នុងការបញ្ចប់សង្គ្រាម គឺមិនអាចទទួលយកបានឡើយ ហើយវាស្មើនឹងការសុំឲ្យព្រមចុះចាញ់។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មាននៅថ្ងៃព្រហស្បតិ៍នេះថា ប្រទេសរុស្ស៊ីនៅតែបើកចំហ ចំពោះដំណោះស្រាយនយោបាយ និងការទូត ហើយចង់បានសន្តិភាព។

ប៉ុន្តែដោយគ្មានឱកាសបែបនេះ លោកបានបញ្ជាក់ថា រុស្ស៊ីនឹងបន្តប្រយុទ្ធ ដើម្បីការពារសន្តិសុខផ្ទាល់ខ្លួន ដើម្បីជាប្រយោជន៍ដល់ក្មេងជំនាន់ក្រោយ។

លោក Peskov បានសង្កត់ធ្ងន់ថា៖ «ភាគីអ៊ុយក្រែន គួរតែដឹងច្បាស់ថា ទោះយូរ ឬឆាប់ ខ្លួននឹងត្រូវតែចរចា តែពីជំហរកាន់តែអាក្រក់ទៅៗ។ ជំហររបស់របបទីក្រុងគីវ នឹងកាន់តែយ៉ាប់យ៉ឺនទៅៗពីមួយថ្ងៃទៅមួយថ្ងៃ»៕