រដ្ឋមន្រ្តីក្រសួងមហាផ្ទៃប៉ាគីស្ថានលោក Mohsin Naqvi និយាយថា ជនបំផ្ទុះគ្រាប់បែកអត្តឃាតទំាង ២រូប នៅក្នុងការវាយប្រហារ ២លើកនាសប្តាហ៍នេះនៅទីក្រុងអ៊ីស្លាម៉ាបាដ និងស្រុក South Waziristan គឺជាជនជាតិអាហ្វហ្គានីស្ថាន ស្របពេលដែលក្រុមអាជ្ញាធរ បានប្រកាសថា បានចាប់ខ្លួនមនុស្សជាច្រើននាក់ ។

លោក Naqvi បានធ្វើសេចក្តីអត្ថាធិប្បាយបែបនេះ នៅក្នុងសភានាថ្ងៃព្រហស្បតិ៍ អំឡុងអង្គប្រជុំដែលត្រូវបានផ្សាយផ្ទាល់លើកញ្ចក់ទូរទស្សន៍ ។

កាលពីថ្ងៃពុធម្សិលមិញ មនុស្សយ៉ាងហោច ១២នាក់ ត្រូវបានសម្លាប់ និងមនុស្សជាង ៣០នាក់ផ្សេងទៀត បានរងរបួស ដែលក្នុងចំណោមពួកគេជាច្រើននាក់ ស្ថិតក្នុងស្ថានភាពធ្ងន់ធ្ងរ ពេលដែលជនបំផ្ទុះគ្រាប់បែកអត្តឃាតម្នាក់ បានបំផ្ទុះខ្លួនឯងនៅច្រកចូលបរិវេនតុលាការស្រុកអ៊ីស្លាម៉ាបាដ ។

នាយកដ្ឋានប្រឆាំងអំពើភេរវកម្មនៅទីក្រុង Rawalpindi ស្ថិតក្នុងខេត្ត Punjab និយាយថា ជនសង្ស័យ ៧នាក់ ត្រូវបានឃាត់ខ្លួន ពាក់ព័ន្ធនឹងការបំផ្ទុះគ្រាប់បែកនៅទីក្រុងអ៊ីស្លាម៉ាបាដ ។ 

កាសែតប្រចាំថ្ងៃ Dawn រាយការណ៍ថា ជនល្មើសរងការចោទប្រកាន់ ត្រូវបានចាប់ខ្លួនពីសង្កាត់ Fauji Colony និងសង្កាត់ Dhoke Kashmirian នៃទីក្រង Rawalpindi ខណៈដែលការវាយឆ្មក់មួយ ត្រូវបានធ្វើឡើងផងដែរនៅខេត្ត Khyber Pakhtunkhwa ។

ដោយឡែក ការវាយប្រហារអត្តឃាតមួយទៀត បានកើតឡើងកាលពីថ្ងៃចន្ទ នៅមហាវិទ្យាល័យស្ថិតក្នុងស្រុក South Waziristan ខេត្ត Khyber Pakhtunkhwa ៕