ទីភ្នាក់ងារសារព័ត៌មានរដ្ឋស៊ីរី SANA បានរាយការណ៍នៅថ្ងៃព្រហស្បតិ៍ (ទី១៣ ខែវិច្ឆិកា) នេះថា រដ្ឋមន្ត្រីក្រសួងការបរទេស និងជននិរទេសរបស់ស៊ីរី លោក Asaad al-Shaibani បានបើកស្ថានទូតរបស់ប្រទេសលោកឡើងវិញ នៅចក្រភពអង់គ្លេស។

សារព័ត៌មាននេះ បានឲ្យដឹងថា រដ្ឋមន្ត្រីការបរទេស និងជននិរទេស លោក Asaad Hassan al-Shaibani នៅថ្ងៃព្រហស្បតិ៍នេះ បានបង្ហូតទង់ជាតិនៅពីលើស្ថានទូតស៊ីរី ក្នុងទីក្រុងឡុងដ្រ៍ ដែលជាការបង្ហាញពីការបើកបេសកកម្មឡើងវិញ បន្ទាប់ពីបិទអស់រយៈពេលជាច្រើនឆ្នាំ។

ហើយលោក Al-Shaibani បានសម្តែងក្តីសង្ឃឹមថា ការបើកដំណើរការឡើងវិញនេះ នឹងឈានទៅរកយុគសម័យថ្មីមួយ ហើយជួយឲ្យស៊ីរីស្តារតួនាទីរបស់ខ្លួនឡើងវិញ នៅឆាកអន្តរជាតិ។

តាមរយៈការបង្ហោះសារនៅលើបណ្ដាញសង្គម X ជាមួយនឹងរូបភាពរបស់លោកនៅលើយ៉ររបស់ស្ថានទូត លោកបានសរសេររៀបរាប់ថា៖ «បន្ទាប់ពីមានភាពឯកោជាច្រើនឆ្នាំដែលត្រូវបានបង្កើតឡើងដោយរបបរបស់លោក (Bashar) al-Assad ថ្ងៃនេះ យើងបើកស្ថានទូតស៊ីរីឡើងវិញហើយ នៅទីក្រុងឡុងដ្រ៍។ ស៊ីរីត្រឡប់មកកាន់ពិភពលោកវិញហើយ ក្រោមអត្តសញ្ញាណសេរីភាពរបស់ខ្លួន»។

គួរបញ្ជាក់ថា ចក្រភពអង់គ្លេសបានដកទណ្ឌកម្មរបស់ខ្លួន ដែលដាក់លើប្រធានាធិបតីស៊ីរី លោក Ahmed al-Sharaa កាលពីសប្តាហ៍មុន៕