កងកម្លាំងយោធាប៉ារ៉ា ដែលកំពុងប្រយុទ្ធជាមួយកងទ័ព នៅក្នុងសង្គ្រាមស៊ីវិលដ៏បង្ហូរឈាមរបស់ប្រទេសស៊ូដង់ កំពុងផ្លាស់ប្តូរការផ្តោតរបស់ខ្លួនទៅភាគខាងកើត បន្ទាប់ពីបានពង្រឹងការកាន់កាប់លើតំបន់ Darfur កាលពីខែមុន ដោយបន្តអំពើហិង្សាកាប់សម្លាប់ និងបើកការវាយប្រហារដោយយានដ្រូននៅទូទាំងតំបន់ផលិតប្រេងភាគខាងត្បូងនៃប្រទេស។

កំណើននៃការវាយប្រហារយានដ្រូន និងការដាក់ពង្រាយកងទ័ព រួមទាំងសព្វាវុធថ្មីៗ ដោយកងកម្លាំងគាំទ្ររហ័សយោធាប៉ារ៉ា (ហៅកាត់ថា RSF) និងកងទ័ពស៊ូដង់ បានចង្អុលបង្ហាញថា ភាគីជម្លោះទាំងពីរ ឥឡូវនេះ កំពុងផ្តោតកិច្ចប្រឹងប្រែងរបស់ពួកគេទៅលើតំបន់ផលិតប្រេង Kordofan ដែលជាតំបន់មួយមានរដ្ឋចំនួន៣ ហើយបម្រើជាតំបន់ទ្រនាប់រវាងបន្ទាយ Darfur ភាគខាងលិចរបស់កងកម្លាំង RSF និងបណ្ដារដ្ឋដែលកាន់កាប់ដោយកងទ័ព នៅភាគខាងកើត។

សាក្សី និងប្រភព បាននិយាយថា យោធា RSF បានចាប់ផ្តើមវាយឆ្ពោះទៅតំបន់ Kordofan ក្នុងពេលដំណាលគ្នា ខណៈខ្លួនបានកាន់កាប់ក្រុង al-Fashir កាលពីចុងខែតុលា និងដណ្តើមបានទីប្រជុំជន Bara ក្នុងរដ្ឋ North Kordofan ដែលជាចំណុចភ្ជាប់យុទ្ធសាស្ត្ររវាងតំបន់ Darfur និងភាគកណ្តាលស៊ូដង់។ កាលពីពីរខែមុននោះ កងទ័ពស៊ូដង់ជាអ្នកគ្រប់គ្រងទីប្រជុំជនដ៏សំខាន់មួយនេះ។

ក្រុមមេធាវីសង្គ្រោះបន្ទាន់ ដែលជាក្រុមសកម្មជនស៊ូដង់ បាននិយាយថា មនុស្សរាប់រយនាក់ត្រូវបានសម្លាប់ក្នុងទីប្រជុំជន Bara ដោយសារភាពតានតឹងដ៏ក្ដៅគគុក។ យោងតាមលោកស្រី Amy Pope ប្រធានអង្គការទេសន្តរប្រវេសន៍អន្តរជាតិ IOM បានឱ្យដឹងថា មនុស្សរហូតដល់ ៥ម៉ឺននាក់ ក៏ត្រូវបង្ខំចិត្តរត់ភៀសខ្លួនចេញពីតំបន់ Kordofan ផងដែរ ចាប់តាំងពីពេលនោះមក៕