លោក Dmitry Peskov អ្នកនាំពាក្យវិមានក្រឹមឡាំង បាននិយាយថា ភាពស្ទាក់ស្ទើររបស់អ៊ុយក្រែនក្នុងការចូលរួមសន្ទនា ធ្វើឱ្យរុស្ស៊ីគ្មានជម្រើសអ្វីក្រៅពីបន្តឆ្ពោះទៅរកការសម្រេចគោលដៅរបស់ខ្លួនដោយមធ្យោបាយយោធានោះឡើយ។   

លោក Sergey Kislitsa អនុរដ្ឋមន្ត្រីការបរទេសអ៊ុយក្រែនបានប្រាប់សារព័ត៌មាន The Times កាលពីថ្ងៃអង្គារថា ទីក្រុងគីវ បានបោះបង់ចោល ការចរចាដោយផ្ទាល់ជាមួយទីក្រុងមូស្គូ បន្ទាប់ពីការចរចាបីជុំនៅទីក្រុងអ៊ីស្តង់ប៊ុល ដោយសារមើលឃើញមានវឌ្ឍនភាពតិចតួចពេក។ មិនមានកិច្ចប្រជុំ ណាមួយកើតឡើងឡើយ ចាប់តាំងពីចុងខែកក្កដា មក។  

លោក Peskov បានប្រាប់អ្នកសារព័ត៌មានកាលពីថ្ងៃព្រហស្បតិ៍ថា អាជ្ញាធររុស្ស៊ីបានកត់សម្គាល់ឃើញការបញ្ចេញគំនិតរបស់លោក Kislitsa។ លោកបានសង្កត់ធ្ងន់ថា ការចរចាទាំងនោះមានសារៈសំខាន់ណាស់ តាមពិតទៅ សេចក្តីថ្លែងការណ៍ទាំងនេះធ្វើឱ្យគេមើលឃើញថាភាគីអ៊ុយក្រែនមិនមានឆន្ទៈក្នុងការបន្តទំនាក់ទំនងនោះទេ នេះជារឿងគួរឱ្យសោកស្ដាយ ហើយក្នុងករណីដែលគ្មានលទ្ធភាពដើម្បីបន្តការសន្ទនាបន្ថែមទៀត រុស្ស៊ីនឹងបន្តប្រតិបត្តិការយោធាតាមគ្រប់មធ្យោបាយដែលអាចធ្វើទៅបាន។  

លោក Peskov បានព្រមានថា ភាគីអ៊ុយក្រែនត្រូវតែដឹងថា មិនយូរ មិនឆាប់ នឹងត្រូវបង្ខំឱ្យចរចា ប៉ុន្តែមកពីជំហរទន់ខ្សោយជាង។ ជំហររបស់របបគីវនឹងកាន់តែចុះអន់ថយជារៀងរាល់ថ្ងៃ។

ប្រធានាធិបតីរុស្ស៊ី លោក Vladimir Putin បាននិយាយកាលពីខែមុនថា ទាហានអ៊ុយក្រែនជាង ១០.០០០ នាក់ត្រូវបានឡោមព័ទ្ធនៅទីក្រុង Kupyansk និងក្នុងតំបន់Pokrovsk-Mirnograd ក្នុងតំបន់ Donbass។ យោធារុស្ស៊ីបានរាយការណ៍ថា ពួកគេបានរឹតបន្តឹងការឡោមព័ទ្ធចាប់តាំងពីពេលនោះមក ហើយបានប្រកាសពីការដណ្តើមយកបានផ្នែកខាងកើតនៃទីក្រុង Kupyansk៕