ប្រទេសប្រេស៊ីល បានវាយបកទល់នឹងការត្អូញត្អែររបស់ប្រធានផ្នែកអាកាសធាតុរបស់អង្គការសហប្រជាជាតិ ជុំវិញការរំលោភសន្តិសុខនៅឯកិច្ចប្រជុំកំពូលបម្រែបម្រួលអាកាសធាតុ(COP30) ក្នុងទីក្រុង Belem ។

លោក Simon Stiell រដ្ឋមន្ត្រីប្រតិបត្តិនៃអនុសញ្ញាក្របខ័ណ្ឌអង្គការសហប្រជាជាតិស្តីពីបម្រែបម្រួលអាកាសធាតុ បានរិះគន់បុគ្គលិកសន្តិសុខរបស់ប្រទេសម្ចាស់ផ្ទះថា «បរាជ័យចំពោះសកម្មភាព» កាលពីយប់ថ្ងៃអង្គារ ទី១១ ខែវិច្ឆិកា នៅពេលដែលក្រុមបាតុករជនជាតិដើមភាគតិចរាប់សិបនាក់បានបង្ខំសម្រុកចូលទៅក្នុងបរិវេណនោះ នេះបើយោងតាមលិខិតដែលរាយការណ៍ដោយសារព៍ត៌មាន Bloomberg News ។

លិខិតរបស់លោកដែលបានផ្ញើទៅកាន់នាយសេនាធិការរបស់ប្រធានាធិបតីប្រេស៊ីល លោក Luiz Inacio Lula da Silva និងទៅកាន់លោក Andre Correa do Lago ជាអ្នកការទូតដែលដឹកនាំកិច្ចប្រជុំកំពូល ដោយបានចោទប្រកាន់ប្រទេសម្ចាស់ផ្ទះថាបានបំពានយ៉ាងធ្ងន់ធ្ងរលើក្របខ័ណ្ឌសន្តិសុខដែលបានបង្កើតឡើង។

វាបានកំណត់ពីភាពងាយរងគ្រោះ ចាប់ពីច្រកទ្វារដែលគ្មានសុវត្ថិភាពរហូតដល់ការខ្វះការធានា ដែលអាជ្ញាធរនឹងឆ្លើយតបចំពោះការបំពាន ព្រមទាំងការព្រួយបារម្ភអំពីសុខភាពនិងសុវត្ថិភាពពីម៉ាស៊ីនត្រជាក់ដែលដំណើរការមិនប្រក្រតី។