រយៈពេលមួយខែបន្ទាប់ពីកិច្ចព្រមព្រៀងបទឈប់បាញ់បានចូលជាធរមាន ភាពស្ងប់ស្ងាត់ខ្លះក៏បានត្រលប់ទៅតំបន់ហ្កាហ្សាស្ទ្រីបវិញ ប៉ុន្តែអ្នកជំនាញបានព្រមានថា ការឈានទៅដល់ដំណាក់កាលទីពីរនៃកិច្ចចរចា កំពុងប្រឈមនឹងឧបសគ្គយ៉ាងសំខាន់ ខណៈភាពជាប់គាំងដ៏អូសបន្លាយ អាចនឹងបញ្ឆេះហានិភ័យនៃការបន្តជម្លោះឡើងវិញ។

ក្រុមសកម្មប្រយុទ្ធហាម៉ាស និងអ៊ីស្រាអែល បានបន្តរក្សាបទឈប់បាញ់ដ៏ផុយស្រួយនៅតំបន់ហ្កាហ្សា ចាប់តាំងពីថ្ងៃទី១០ ខែតុលា មក បន្ទាប់ពីការប្រយុទ្ធដ៏បង្ហូរឈាមជាងពីរឆ្នាំ។ ការអនុវត្តដំណាក់កាលទី១ នៃកិច្ចព្រមព្រៀងឈប់បាញ់ — ដែលផ្តោតលើការជំរុញជំនួយមនុស្សធម៌ និងការផ្លាស់ប្តូរចំណាប់ថ្នូរអ្នកទោស — ទទួលបានលទ្ធផលជាក់ស្តែង។

ក្រុមហាម៉ាស បានដោះលែងចំណាប់ថ្នូរនៅរស់ ២០ នាក់ និងសាកសព ២៤នាក់ផ្សេងទៀត ខណៈអ៊ីស្រាអែល ប្រគល់សពជនជាតិប៉ាឡេស្ទីនប្រមាណ ៣០០នាក់។ ការផ្តល់ជំនួយក៏ប្រសើរឡើងគួរឱ្យកត់សម្គាល់ ដោយគិតពីការចាប់ផ្តើមបទឈប់បាញ់ រហូតដល់ថ្ងៃទី៣ ខែវិច្ឆិកា អង្គការសហប្រជាជាតិ និងដៃគូរបស់ខ្លួន បានដឹកជញ្ជូនសម្ភារៈមនុស្សធម៌ជាង ៣៧.០០០តោន ទៅហ្កាហ្សា។

ទោះបីជាមានផលល្អទាំងនេះក៏ដោយ ក៏បទឈប់បាញ់នៅតែមិនច្បាស់លាស់ ខណៈភាគីទាំងពីរបានចោទដាក់គ្នាទៅមកអំពីការបំពាន និងការប៉ះទង្គិចជាបន្តបន្ទាប់។ ជំនួយការសាស្រ្តាចារ្យនៅវិទ្យាស្ថានសិក្សាមជ្ឈិមបូព៌ា នៃសាកលវិទ្យាល័យសៀងហៃ ឈ្មោះ Shu Meng បានព្រមានថា ឧប្បត្តិហេតុនានាដូចជាការវាយប្រហារជាបន្តបន្ទាប់បែបនេះ កំពុងបំផ្លាញមូលដ្ឋានគ្រឹះសម្រាប់កិច្ចពិភាក្សានាពេលអនាគត និងធ្វើឱ្យស្មុគស្មាញដល់កិច្ចប្រឹងប្រែងដើម្បីឈានទៅដំណាក់កាលទីពីរ៕