ទីភ្នាក់ងាររដ្ឋាភិបាលនេប៉ាល់ បាននិយាយកាលពីថ្ងៃអង្គារសប្ដាហ៍នេះថា យ៉ាងហោចណាស់មនុស្សចំនួន ១៤០នាក់ បានបាត់បង់ជីវិត ក្នុងគ្រោះមហន្តរាយនានាដែលបណ្តាលមកពីភ្លៀងធ្លាក់ដ៏កំណាច នៅទូទាំងប្រទេសនេប៉ាល់ អំឡុងរដូវកាលខ្យល់មូសុង ដែលមានរយៈពេលដល់ទៅ ១៣៥ថ្ងៃ នៅក្នុងឆ្នាំ២០២៥ នេះ។

អាជ្ញាធរកាត់បន្ថយ និងគ្រប់គ្រងហានិភ័យគ្រោះមហន្តរាយជាតិ របស់ប្រទេសនេះ បាននិយាយនៅក្នុងរបាយការណ៍មួយថា នៅក្នុងឧប្បត្តិហេតុគ្រោះមហន្តរាយចំនួន ១.៤៥៤ករណី មានមនុស្សចំនួន ៣០នាក់នៅតែបាត់ខ្លួន ខណៈមនុស្ស ៣០០នាក់ បានរងរបួស។

យោងតាមរបាយការណ៍ គ្រោះបំណាក់ដីបាននាំឱ្យមានអ្នកស្លាប់ច្រើនជាងគេ ក្នុងតួលេខ ៦៧នាក់ បន្ទាប់មកគឺទឹកជំនន់ និងរន្ទះបាញ់ រួមទាំងគ្រោះថ្នាក់ផ្សេងទៀត។ ជាមួយគ្នានេះ ក្រុមគ្រួសារសរុបជិត ៦ពាន់គ្រួសារ បានរងផលប៉ះពាល់ ដោយគ្រោះមហន្តរាយផ្សេងៗ នៅចន្លោះរដូវខ្យល់មូសុងនេះ ចាប់ពីថ្ងៃទី២៩ ខែឧសភា ដល់ថ្ងៃទី១០ ខែតុលា កន្លងទៅ។

ទន្ទឹមនឹងនេះដែរ អាជ្ញាធរក៏បានកត់សម្គាល់នៅក្នុងរបាយការណ៍នេះថា មនុស្សចំនួន ១២០នាក់ បន្ថែមទៀតបានស្លាប់ និងជាង ៦០០នាក់ ផ្សេងទៀតបានរងរបួស នៅក្នុងគ្រោះមហន្តរាយនានា ដូចជាអគ្គិសភ័យ និងពស់ចឹកជាដើម ក្នុងអំឡុងរដូវមូសុងដ៏កំណាចនោះ៕