មេដឹកនាំបណ្តោះអាសន្ន លោក Muhammad Yunus បាននិយាយកាលពីថ្ងៃព្រហស្បតិ៍ ទី១៣ ខែវិច្ឆិកា ថា ប្រទេសបង់ក្លាដែស នឹងធ្វើប្រជាមតិលើធម្មនុញ្ញកំណែទម្រង់លទ្ធិប្រជាធិបតេយ្យដ៏សំខាន់មួយនៅថ្ងៃតែមួយជាមួយនឹងថ្ងៃបោះឆ្នោតសភារបស់ខ្លួនដែលបានគ្រោងទុកនៅខែកុម្ភៈ ឆ្នាំ២០២៦។

លោក Yunus ដែលជាម្ចាស់រង្វាន់ណូបែលសន្តិភាពអាយុ៨៥ឆ្នាំ បាននិយាយថា លោកបានទទួលមរតកនូវប្រព័ន្ធនយោបាយដែល «បែកបាក់ទាំងស្រុង» បន្ទាប់ពីបានចូលគ្រប់គ្រងក្រោយការប៉ះបោកាលពីឆ្នាំមុន។ មេដឹកនាំបណ្តោះអាសន្ននៃប្រទេសអាស៊ីខាងត្បូងដែលមានប្រជាជនចំនួន១៧០លាននាក់មួយនេះ បានអះអាងថា កំណែទម្រង់ធម្មនុញ្ញដែលលោកបានគាំទ្រជាមូលដ្ឋាននៃកេរដំណែលរបស់លោក មានសារៈសំខាន់ក្នុងការទប់ស្កាត់ការវិលត្រឡប់ទៅរកការគ្រប់គ្រងបែបផ្តាច់ការ។

លោក Yunus បាននិយាយនៅក្នុងសុន្ទរកថា ថា «យើងបានសម្រេចថា ការធ្វើប្រជាមតិនឹងត្រូវធ្វើឡើងនៅថ្ងៃតែមួយជាមួយនឹងថ្ងៃបោះឆ្នោតសភាបន្ទាប់»។ «នេះនឹងមិនរារាំងគោលដៅនៃកំណែទម្រង់តាមមធ្យោបាយណាមួយឡើយ»។ មានភាពតានតឹងខ្ពស់ខណៈគណបក្សនានា ត្រៀមសម្រាប់ការបោះឆ្នោត។

ប្រធានរដ្ឋអាជ្ញាក្នុងការជម្រះក្តីឧក្រិដ្ឋកម្មប្រឆាំងមនុស្សជាតិរបស់អតីតនាយករដ្ឋមន្ត្រី លោកស្រី Sheikh Hasina ដែលកំពុងរត់គេចខ្លួនបាននិយាយកាលពីថ្ងៃព្រហស្បតិ៍ថា ចៅក្រមនឹងចេញសាលក្រមដែលត្រូវបានរំពឹងទុកនៅថ្ងៃទី១៧ ខែវិច្ឆិកា។ លោកស្រី Hasina អាយុ៧៨ឆ្នាំ បានផ្គើនទៅនឹងសេចក្តីបង្គាប់របស់តុលាការឱ្យវិលត្រឡប់ពីប្រទេសឥណ្ឌាដើម្បីចូលរួមក្នុងការជម្រះក្តីរបស់លោកស្រីដោយចោទប្រកាន់ពីបទ បញ្ជាឱ្យមានការបង្រ្កាបដ៏បង្ហូរឈាមនៅក្នុងការប៉ុនប៉ងដែលបរាជ័យក្នុងការបង្ក្រាបការប៉ះបោដឹកនាំដោយនិស្សិត ដែលបានឈានទៅរកការដកលោកស្រីចេញពីតំណែង។