ការវាយប្រហារដោយការលួចដុតរបស់អ្នកតាំងលំនៅឋានជនជាតិអ៊ីស្រាអែលនៅវិហារអ៊ីស្លាមមួយកន្លែងនៅតំបន់កាន់កាប់ West Bank បានធ្វើឲ្យមានការថ្កោលទោសជាអន្តរជាតិ ខណៈរលកនៃអំពើហិង្សាកាន់តែខ្លាំងប្រឆាំងប៉ាឡេស្ទីននៅតែបន្តកើតមាននៅទូទាំងតំបន់។

អ្នកស្រុកបាននិយាយថា អ្នកតាំងលំនៅឋានជនជាតិអ៊ីស្រាអែលបានដុតបំផ្លាញវិហារអ៊ីស្លាម Hajja Hamida នៅក្នុងភូមិ Deir Istiya ដែនដីប៉ាឡេស្ទីនភាគខាងជើងតំបន់ West Bank កាលពីព្រឹកថ្ងៃព្រហស្បតិ៍ ។

រូបថតជាច្រើនដែលត្រូវបានថតនៅកន្លែងកើតហេតុ បានបង្ហាញពីពាក្យស្លោកប្រឆាំងប៉ាឡេស្ទីន និងប្រកាន់ពូជសាសន៍ ដោយបានបាញ់ថ្នាំទៅលើជញ្ជាំងវិហារអ៊ីស្លាម ដែលរងការខូចខាតដោយសារភ្លើងឆេះ ខណៈច្បាប់ចម្លងនៃគម្ពីគូរ៉ាន សៀវភៅបរិសុទ្ធអ៊ីស្លាម ក៏ត្រូវបានឆេះបំផ្លាញផងដែរ។

អាជ្ញាធរកិច្ចការសាសនាប៉ាឡេស្ទីន បានថ្កោលទោសអ្វីដែលខ្លួនបាននិយាយថាជា «ឧក្រិដ្ឋកម្មដ៏ឃោឃៅ» បង្ហាញពី «ភាពព្រៃផ្សៃ» ដែលអ៊ីស្រាអែលប្រព្រឹត្តចំពោះទីតាំងដ៏ពិសិដ្ឋរបស់ពលរដ្ឋមូស្លីម និងគ្រិស្តបរិស័ទ នៅដែនដីប៉ាឡេស្ទីន។

ទីភ្នាក់ងារសារព័ត៌មាន Wafa បានរាយការណ៍ថា ដោយឡែកកុមារប៉ាឡេស្ទីនពីរនាក់ត្រូវបានសម្លាប់កាលពីថ្ងៃព្រហស្បតិ៍ នៅពេលដែលកងកម្លាំងអ៊ីស្រាអែលបានបើកការបាញ់ប្រហារអំឡុងពេលការវាយឆ្មក់នៅក្នុងទីក្រុង Beit Ummar ក្បែរទីក្រុង Hebron ភាគខាងត្បូងតំបន់ West Bank។