នគរបាលបានបាញ់ឧស្ម័នបង្ហៀរទឹកភ្នែកទៅលើក្រុមបាតុករនៅជិតវិមានជាតិរបស់ទីក្រុង Mexico City ប្រទេសម៉ិកស៊ិកកាលពីថ្ងៃព្រហស្បតិ៍ ទី១៣ ខែវិច្ឆិកា ខណៈភាពតានតឹងបានផ្ទុះឡើងក្នុងអំឡុងពេលតវ៉ាដោយកិច្ចការសម្របសម្រួលជាតិនៃបុគ្គលិកអប់រំ (CNTE) ជុំវិញកំណែទម្រង់ការងារ និងការអប់រំ។ គ្រូបង្រៀន និងសមាជិកសហជីពរាប់រយនាក់ បានដើរដង្ហែរក្បួននៅទូទាំងរដ្ឋធានី ដោយមួយចំនួនបានប្រមូលផ្តុំគ្នានៅក្រៅសភា ដើម្បីបន្តការទាមទាររបស់ពួកគេសម្រាប់ការជួបសន្ទនាជាមួយរដ្ឋាភិបាល។

លោក Felipe Ramos Trejo អ្នកតំណាងសហជីពបានរិះគន់ការឆ្លើយតបរបស់អាជ្ញាធរដោយនិយាយថា «គួរឲ្យសោកស្តាយ យើងកំពុងមើលឃើញថា ជំនួសឱ្យការឈានឆ្ពោះទៅមុខ យើងកំពុងតែដើរថយក្រោយ។ យើងនៅពីក្រោយវិមានជាតិ ហើយពួកគេបានគប់ឧស្ម័នបង្ហៀរទឹកភ្នែកមកលើយើង ដូច្នេះយើងត្រូវដកថយដើម្បីសុវត្ថិភាព»។ ក្រុមអ្នកតវ៉ា បានចោទនគរបាលថាបានប្រើប្រាស់កម្លាំងហួសហេតុ។

នៅខាងក្រៅសភា លោក Pedro Hernandez Morales អគ្គលេខាធិការនៃកិច្ចការសម្របសម្រួលជាតិនៃបុគ្គលិកអប់រំ (CNTE) បានព្រមានពីសកម្មភាពបន្ថែមទៀតដោយបញ្ជាក់ថា ប្រសិនបើពុំមានការឆ្លើយតបទេ សហជីពអាចអំពាវនាវកូដកម្មនៅទូទាំងប្រទេស។

ការតវ៉ានេះគឺជាផ្នែកមួយនៃការប្រមូលផ្តុំកាន់តែទូលំទូលាយដោយបុគ្គលិកអប់រំនៅទូទាំងប្រទេសម៉ិកស៊ិក ដែលអះអាងថា វិធានការរបស់រដ្ឋាភិបាលនាពេលថ្មីៗនេះធ្វើឱ្យប៉ះពាល់ដល់សិទ្ធិការងារ និងការអប់រំសាធារណៈ។